Federata Ndërkombëtare e Futbollit (FIFA) ka konfirmuar se kombëtarja e Iranit pritet të marrë pjesë normalisht në Kupën e Botës 2026 në Shtetet e Bashkuara, pavarësisht tensioneve dhe konfliktit të fundit mes dy vendeve.

Presidenti i FIFA-s, Gianni Infantino, bëri të ditur se gjatë një takimi me presidentin amerikan Donald Trump është diskutuar edhe situata e Iranit dhe pjesëmarrja e ekipit të tij kombëtar në turneun më të madh të futbollit në botë. Sipas Infantinos, Trump ka garantuar se kombëtarja iraniane është e mirëpritur në SHBA për të marrë pjesë në Botëror.

Irani është planifikuar të zhvillojë ndeshjet e fazës së grupeve në SHBA, duke u përballur me Zelandën e Re më 15 qershor në Inglewood të Kalifornisë, me Belgjikën më 21 qershor në të njëjtin qytet dhe me Egjiptin më 26 qershor në Seattle.

Recently Spotted Asteroid Set for Near Miss With EarthKeep Watching

Pjesëmarrja e Iranit kishte qenë në pikëpyetje për shkak të konfliktit të fundit në Lindjen e Mesme dhe tensioneve mes Teheranit dhe Uashingtonit. Megjithatë, FIFA ka bërë të qartë se deri tani nuk ka asnjë vendim përjashtues ndaj ekipit aziatik.

Edhe drejtori i operacioneve të Kupës së Botës në FIFA, Heimo Schirgi, ka theksuar se organizata po monitoron nga afër zhvillimet e konfliktit, por ka siguruar se turneu do të zhvillohet sipas planit.

Botërori 2026 do të zhvillohet nga 11 qershori deri më 19 korrik dhe do të organizohet për herë të parë nga tre vende së bashku: Shtetet e Bashkuara, Kanadaja dhe Meksika. Sipas FIFA-s, pavarësisht situatës gjeopolitike, qëllimi mbetet që të gjitha ekipet e kualifikuara të marrin pjesë në këtë event global që synon të bashkojë njerëzit përmes sportit.