Në seancën e 27-të të Këshillit të Komunës së Kërçovës, me shumicë votash të këshilltarëve komunal u miratua marrëveshja ndërmjet NP “Komunalec”, Komunës së Kërçovës dhe NP “Studençica” për shlyerjen e borxhit që “Komunalec” ka ndaj Studenëicës. Vlera totale e borxhit arrin në rreth 123 milionë denarë.
Drejtori i NP “Komunalec”, Bojan Stojkoski, tha se miratimi i kësaj marrëveshjeje është i domosdoshëm për të shmangur bllokimin e ndërmarrjes. Sipas tij, për këtë çështje ekziston edhe një vendim gjyqësor nga Gjykata Evropiane për të Drejtat e Njeriut.

Megjithatë, marrëveshja u kundërshtua nga këshilltarët e AKI-së, të cilët e cilësuan atë si një goditje shtesë për xhepat e qytetarëve. Ata theksuan gjithashtu se marrëveshja është jotransparente.

Në përgjigje të kritikave, drejtori Stojkoski u shpreh se borxhi është i akumuluar që nga viti 2014. Ndërkohë, këshilltarët e AKI-së theksuan se edhe në të kaluarën borxhe të ngjashme janë trashëguar nga periudha të mëparshme.