Këngëtari Besart Kelmendi, i njohur për publikun si Gjesti, ka dhënë dëshminë e tij në gjykatë lidhur me incidentin për të cilin po hetohet.

Ai ka thënë se gjithçka ka ndodhur në një moment të vështirë emocional dhe ka kërkuar falje për situatën.

“Dua ta njoftoj gjykatën se jam në ankth dhe kam vepruar në gjendje ankthi. I kërkoj falje gjykatës, prokurorit dhe palës së dëmtuar”, ka deklaruar ai gjatë seancës.

Nga ana tjetër, avokati i tij ka kundërshtuar kërkesën e Prokurorisë për paraburgim, duke argumentuar se reagimi ka qenë impulsiv dhe se në raste të tilla zakonisht nuk ekziston rreziku që një veprim i tillë të përsëritet.

Megjithatë, Gjykata në Prishtinë ka vendosur t’i caktojë këngëtarit masën e paraburgimit prej një muaji.

Gjesti u arrestua më 11 mars 2026 në Prishtinë nën akuzën për armëmbajtje pa leje. Sipas policisë, arrestimi ndodhi rreth orës 15:00 në rrugën “Mehmet Isahi”, ku artisti u ndalua dhe më pas u shoqërua në komisariat për t’u marrë në pyetje. Pas intervistimit, me vendim të prokurorit ai u dërgua në ndalim policor për 48 orë.

Një ditë më vonë, më 12 mars 2026, mediat raportuan edhe rrethanat që çuan në arrestim. Sipas burimeve, këngëtari kishte shkuar në zyrat e kompanisë muzikore Onima, ku pati një konflikt verbal me drejtuesin e saj, Erkand Shabani.