Mbrëmë në orën 02:15, qytetarët e Koçanit dhe vendbanimeve rreth tij u mblodhën para ish-diskotekës PULS në një kujtim të qetë dhe respekti, duke nderuar 63 viktimat e zjarrit të madh dhe tragjedisë më të rëndë që i ka ndodhur qytetit.

Në orën 02:32, momenti që ndryshoi përgjithmonë Koçanin, të gjithë qëndruan në një minutë heshtje. “Le të dëshmojë drita se nuk harrojmë, ndërsa heshtja flet për dashurinë që mbetet”, ishte mesazhi që ata dërguan.

Gjithçka nisi natën e 14 marsit 2025, rreth orës 02:30, kur zjarri shpërtheu në diskotekën “Puls” në qendër të Koçanit. Sipas raporteve fillestare të MPB-së, flakët u përhapën për vetëm pak minuta për shkak të materialeve djegëse dhe hapësirave të mbingarkuara.

Dëshmitarët deklaruan se në momentin e tragjedisë në klub ndodheshin më shumë se 300 persona, prej të cilëve një numër i madh ishin adoleshentë dhe të rinj. Paniku dhe kaosi mbizotëruan në të gjitha daljet; shumë prej tyre nuk arritën të evakuoheshin në kohë. Objekti nuk dispononte dalje zjarri dhe as nuk plotësonte standardet bazë të sigurisë, gjë që e bëri tragjedinë edhe më të madhe.

63 persona humbën jetën në vendngjarje, rrugës për në spitale ose gjatë mjekimit, ndërsa mbi 50 u plagosën rëndë dhe u hospitalizuan në Shkup, Shtip dhe Koçan. Të lënduarit më rëndë u dërguan për mjekim në vendet fqinje.

Procesi gjyqësor nisi disa muaj pas tragjedisë. Të akuzuarit pretendojnë se zjarri ishte një aksident, ndërsa prokuroria prezantoi fotografi, videomateriale dhe dëshmi që tregojnë lëshime serioze në menaxhimin e klubit. Gjatë gjykimit u prezantuan edhe raporte nga Shërbimi Zjarrfikës, ekspertiza për sigurinë e objekteve dhe dëshmi nga të mbijetuarit, të cilët përshkruan panikun, pamundësinë për evakuim dhe kaosin që mbretëronte.(INA)