Organizata humanitare Kalliri i Mirësisë në Kërçovë, në prag të festës së Fitër Bajramit, ka nisur realizimin e aksionit humanitar “Shporta e Bajramit”.
Kryetari i kësaj organizate, Muhamet Mehmeti, njoftoi se në kuadër të këtij aksioni do të shpërndahen rreth 200 pako me artikuj ushqimorë për familjet në nevojë në rajonin e Kërçovës.

Ai bëri të ditur gjithashtu se për festën e Bajramit, organizata do të ndajë edhe 200 kupona për fëmijët jetimë dhe ata që vijnë nga familje me status të rrezikuar social, të cilat do t’u mundësojnë atyre të blejnë veshmbathje në pika të caktuara.

Nga Kalliri i Mirësisë theksojnë se edhe gjatë muajit të Ramazanit kanë realizuar një sërë aktivitetesh humanitare, përfshirë edhe shpërndarjen e iftareve për familjet në nevojë.

Në fund, Muhamet Mehmeti falënderoi të gjithë donatorët dhe aktivistët që kanë kontribuar në realizimin e këtyre aktiviteteve humanitare në rajonin e Kërçovës.