Në një atmosferë mirënjohjeje dhe respekti, sot në Kërçovë u shënua pensionimi i Medin Bekteshit, një emër i njohur për kontributin e tij të gjatë në institucionet publike dhe jetën shoqërore. Pas dekadash pune, sfidash dhe angazhimi të palëkundur, ai përmbyll një rrugëtim profesional që la gjurmë të rëndësishme në komunitet dhe në shërbim të qytetarëve.

Medin Bekteshi u lind në vitin 1962 në fshatin Sërbicë. Arsimin fillor dhe të mesëm e kreu në Kërçovë. I ndikuar nga babai i tij, mësuesi Isen Bekteshi, një figurë e respektuar dhe arsimdashëse, Medini vazhdoi studimet në Prishtinë, ku u regjistrua dhe diplomoi me sukses në Fakultetin e Gjeologjisë.

Pas përfundimit të studimeve, ai u punësua për një periudhë në Minierën e Trepçës në Mitrovicë. Mirëpo, gjatë viteve të ’90-ta, në kohën kur shumë shqiptarë largoheshin nga vendet e punës, edhe Bekteshi u përball me padrejtësi, duke u larguar nga puna dhe më pas edhe u burgos nga sistemi i atëhershëm monist.

Pas lirimit nga burgu, ai u kthye në Kërçovë, ku për një kohë të gjatë, pavarësisht kualifikimit në një fushë deficitare si gjeologjisë, nuk arriti të punësohej në institucionet shtetërore, përfshirë edhe Termocentralin e Osllomesë. Në mungesë të mundësive, ai u angazhua në sektorin privat.

Më vonë, Bekteshi filloi të kontribuojë në institucione publike, fillimisht si udhëheqës në Fondin për rrugë lokale në Kërçovë. Në vitin 2005, ai u emërua si udhëheqësi i parë shqiptar në Ndërmarrjen Publike për menaxhimin e banesave dhe lokaleve afariste në pronësi shtetërore në Kërçovë, një detyrë që e ushtroi për shumë vite me përkushtim të veçantë, sidomos në ndihmë të familjeve në nevojë.

Përveç angazhimit profesional, ai ishte aktiv edhe në jetën politike dhe publike, duke shërbyer si këshilltar komunal, kryetar i degës së PDK-së në Kërçovë dhe sekretari i parë i degës së BDI-së në vitet e themelimit të saj.

Në shenjë mirënjohjeje për kontributin e tij shumëvjeçar, kolegët nga Shoqëria Aksionare për menaxhimin e lokaleve afariste në Kërçovë organizuan një ceremoni nderimi për pensionimin e tij.

Udhëheqësi i njësisë rajonale, Rexhep Emini, në një postim publik ka shkruar:

“Urime pensionimin! Faleminderit për përkushtimin, urtësinë dhe kontributin. Paç shëndet dhe gëzofsh vitet në vijim pranë familjes dhe njerëzve të dashur!”ka shkruar Emini