Kryetari i Qeverisë së Republikës së Maqedonisë së Veriut, Hristijan Mickoski, sot duke u përgjigjur pyetjes gazetareske lidhur me atë nëse është rënë dakord për uljen e çmimit të karburanteve me OKTA-n, deklaroi:

„Po, gjatë ditës së djeshme, ministrja e Energjetikës, Burimeve Minerale dhe Minierave pati një bisedë me drejtorin e përgjithshëm të OKTA-s dhe në mënyrë plotësuese kemi edhe një denar tjetër. Kështu që sot do të kemi, praktikisht nga sot 3 denarë zbritje në të gjitha ato pika karburanti që janë klientë të OKTA-s. Kështu që nga këto çmime që janë maksimale, të cilat i përcaktoi dje Komisioni Rregullator për Energjetikë, kemi 3 denarë zbritje, me çka do të vijmë në përfundim se kemi absolutisht karburantet më të lira në Evropë në këtë moment, çmime të karburanteve.“

Në pyetjen nëse po shqyrtohet që Maqedonia ta kufizojë blerjen e karburanteve, duke pasur parasysh paralajmërimet e vendeve të rajonit se do të kufizojnë blerjen e karburanteve, si dhe faktin që është vërejtur se qytetarët e shteteve përreth blejnë karburant tek ne, kryeministri Mickoski tha:

„Në këtë moment gjendja është si vijon. Kemi sasi absolutisht të mjaftueshme për nevojat e qytetarëve, është rritur konsumi në zona të caktuara kufitare, me Shqipërinë, në veri me Kosovën dhe Serbinë, dhe në jug me Greqinë. Përafërsisht, konsumi i përgjithshëm është rritur për 10%, sepse një pjesë e madhe e qytetarëve nga këto vende vijnë tek ne dhe mbushin karburant në pikat e karburantit te ne, për shkak se çmimi i karburanteve te ne, në disa raste, është edhe deri në gjysmë euro (50 euro centë) për litër më lirë se ai tek ata. Për dallim nga e kaluara kur, si vend gjunjëzoheshim dhe lypnim ndihmë, tani ne jemi ata që gjenerojnë stabilitet dhe japin ndihmë.“

„Dua të them se edhe naftësjellësi është në funksion të plotë, gjegjësisht tubacioni është plot, gjë që paraqet siguri shtesë, depot janë plot sipas ligjit, rezervat shtetërore janë rreth gjashtëdhjetë ditë, kështu që në këtë moment, absolutisht nuk ka asnjë nevojë për një masë të tillë. Dhe jo vetëm me karburantet dizel dhe me benzinat pa plumb me 95 dhe 98 oktanë, jam i informuar se edhe një pjesë e aeroporteve përreth furnizohen me kerozinë nga OKTA, gjegjësisht prej nesh.

Kështu që nga një vend që, do të përsëris, gjunjëzohej dhe lypte, po bëhemi një vend që gjeneron stabilitet në rajon; natyrisht sfida ka dhe do të ketë. Dhe ato sfida ne do t’i zgjidhim. Por ajo që është më e rëndësishmja dhe është prioriteti ynë, është se si shtet kemi çmimin më të ulët të karburanteve për qytetarët tanë dhe çmimin më të ulët të karburanteve për biznesin.“