Irani ka marrë një propozim me 15 pika nga Shtetet e Bashkuara për arritjen e një armëpushimi në konfliktin aktual, sipas dy zyrtarëve pakistanezë, raporton AP.

Sipas tyre, propozimi amerikan përfshin një sërë çështjesh kyçe, mes të cilave lehtësimi i sanksioneve, bashkëpunimi në fushën bërthamore për qëllime civile, kufizimi i programit bërthamor të Iranit, si dhe monitorimi nga Agjencia Ndërkombëtare e Energjisë Atomike.

Po ashtu, në paketë përfshihen edhe kufizime mbi programin raketor, si dhe garantimi i aksesit të lirë të transportit detar përmes Ngushticës së Hormuzit, një korridor strategjik për tregtinë globale të energjisë.

Zyrtarët pakistanezë, të cilët folën në kushte anonimiteti pasi nuk ishin të autorizuar të bënin publike detajet, nuk dhanë më shumë informacione mbi përmbajtjen e plotë të propozimit.

Ndërkohë, Irani ka këmbëngulur se nuk është i përfshirë në negociata me Shtetet e Bashkuara. Një zëdhënës ushtarak iranian gjithashtu ka ironizuar përpjekjet diplomatike të Uashingtonit, duke i hedhur poshtë pretendimet për bisedime në zhvillim.