Në Shkollën Fillore “Rexhë Rushit Zajazi” në Zajaz, tashmë për gati tre javë nxënësit nuk po ndjekin mësim në lëndën e matematikës, për shkak të mungesës së arsimtarit përkatës. Këtë e kanë bërë të ditur për Tv Uskana si prindërit e nxënësve, ashtu edhe vetë shkolla.
Sipas burimeve të televizionit Uskana, problemi lidhet me mungesën e pëlqimit nga ana e Komunës së Kërçovës për punësimin e një mësimdhënësi të ri, duke i lënë kështu nxënësit pa një nga lëndët bazë në procesin arsimor.
Lidhur me këtë çështje, Tv Uskana ka drejtuar pyetje me shkrim deri te kryetari i Komunës së Kërçovës, Aleksandar Jovanovski, i cili në përgjigjen e tij theksoi:
“Shumë më vjen keq dhe konsideroj se në asnjë rast fëmijët nuk duhet të humbasin orë mësimore. Fat-keqësisht, për arsye administrative po vonohet punësimi i një mësuesi të matematikës, por menjëherë do të ndërmarr hapa për zgjidhjen e këtij problemi.”
Megjithatë, pavarësisht këtij premtimi, nxënësit vazhdojnë të mbeten pa mësim në matematikë, duke ngri-tur shqetësime te prindërit për zvarritjen e procedurave dhe pasojat që kjo mund të ketë tek nxënësit. Tv Uskana do të vazhdojë të informojë në ditët në vijim për zhvillimet dhe zgjidhjen e këtij problemi.