Kërçovë – Një reagim publik është bërë nga këshilltari komunal Ilir Rushani lidhur me vendimin për shkurtimin e dy paraleleve në gjuhën shqipe në SHMK “Drita” në Kërçovë, një në drejtimin e gjimnazit dhe një në drejtimin profesional të makinerisë.

Sipas Rushanit, ky vendim cenon drejtpërdrejt të drejtën e nxënësve shqiptarë për arsimim në gjuhën amtare, sidomos duke marrë parasysh interesimin e lartë për këto drejtime. Ai shtron dilemën se ku do të sistemohen nxënësit që mbesin jashtë, kur në komunë funksionon vetëm një gjimnaz me mësim në gjuhën shqipe.

Ai gjithashtu ngre shqetësime për ndikimin e këtij vendimi mbi stafin arsimor, duke pyetur se sa mësimdhënës mund të rrezikojnë vendet e punës dhe nëse është bërë një analizë e mirëfilltë për pasojat në sistemin arsimor lokal.

Rushani e konsideron të paqartë edhe bazën mbi të cilën është marrë vendimi për publikimin e Konkursit nga Ministria e Arsimit dhe Shkencës për vitin shkollor 2026/2027, ku parashihen dy paralele më pak krahasuar me vitin aktual.

Ai thekson se, ndonëse mbështet proceset e optimizimit në arsim, ato duhet të realizohen në mënyrë të drejtë, të planifikuar dhe pa dëmtuar interesin e nxënësve, veçanërisht në fazën fillestare të regjistrimit.

Në fund, Rushani i bën thirrje Ministrisë së Arsimit dhe Shkencës që të rishqyrtojë vendimin dhe të garantojë transparencë dhe drejtësi në proces, duke shtuar se “arsimi nuk është statistikë, por e ardhmja jonë.”