Vendimi i fundit i Këshillit të Komunës së Çairit për të marrë një kredi afatgjate prej 120 milionë denarësh (rreth 2 milionë euro) ka nxitur reagime të forta politike. Nga BDI-Dega Çair, Imrane Veliu e cilësoi këtë huamarrje si një veprim jotransparent dhe të padrejtë, duke akuzuar se mjetet do të përdoren për të mbuluar detyrime të krijuara për interesa zgjedhore.

Në një konferencë për media, Veliu tha se, ndonëse vendimi paraqitet si teknik, në thelb ai është politik dhe me pasoja afatgjata për qytetarët.
Sipas saj, kredia nuk ka për qëllim zhvillimin apo realizimin e projekteve kapitale, por shlyerjen e borxheve ekzistuese të komunës.

“Kjo nuk është kredi për zhvillim. Kjo është kredi për të mbuluar dështimet,” theksoi Veliu, duke shtuar se barra financiare do të bjerë mbi qytetarët për një periudhë 10-vjeçare.
Ajo ngriti dyshime serioze për mënyrën se si janë krijuar detyrimet aktuale, duke pretenduar se fondet publike janë shpenzuar në kontrata të përkohshme gjatë periudhës zgjedhore, financime të aktiviteteve partiake, si dhe në shpenzime që, sipas saj, nuk kanë pasur lidhje me zhvillimin e komunës.

“Po krijohet një model i rrezikshëm: shpenzohet për zgjedhje, fitohet pushteti, merret kredi dhe borxhi u lihet qytetarëve,” deklaroi Veliu.

Nga BDI-Çair vlerësojnë se vendimi është i padrejtë, pasi sipas tyre, qytetarët do të paguajnë për shpenzime nga të cilat nuk kanë përfituar dhe për të cilat nuk kanë pasur asnjë rol vendimmarrës.
Një tjetër shqetësim i ngritur lidhet me mungesën e transparencës. Sipas Veliut, nuk është bërë publik asnjë detaj mbi detyrimet që do të shlyhen, mënyrën e krijimit të tyre apo përgjegjësinë institucionale dhe individuale.

BDI Çair kërkon publikimin e plotë të të gjitha detyrimeve që do të mbulohen me këtë kredi, realizimin e një auditimi të pavarur për shpenzimet para zgjedhjeve, si dhe përcaktimin e përgjegjësisë për çdo keqpërdorim të mundshëm të mjeteve publike.

“Çairi nuk mund të trajtohet si arkë zgjedhore që zbrazet gjatë fushatës dhe mbushet me kredi pas saj,” deklaroi Veliu, duke shtuar se komuna ka nevojë për përgjegjësi dhe jo për borxhe që rëndojnë mbi të ardhmen e qytetarëve.