Rreth njëqind punëtorë nga fabrika e tekstilit “Артекс” në Koçan mbetën pa punë pas mbylljes së kompanisë. Një pjesë e tyre dolën në protestë para fabrikës, duke kërkuar përgjigje për të ardhmen e tyre dhe për pagat e papaguara.

Punëtorët thonë se kompania u ka borxh dy paga dhe regresin e pushimit vjetor. Sipas tyre, u ishte premtuar se do t’u paguheshin detyrimet e prapambetura, por në fund disa prej tyre kanë marrë vendime për ndërprerje me marrëveshje të kontratës së punës.

Punëtorët e revoltuar refuzuan t’i nënshkruajnë këto dokumente, ndërsa disa prej tyre i grisën para hyrjes së fabrikës. Shqetësimi për të ardhmen është i madh, prandaj ata i bëjnë thirrje shtetit që të përfshihet në zgjidhjen e problemit të pagave të papaguara.

Mbyllja e fabrikës është një tjetër goditje e rëndë për sektorin e tekstilit në pjesën lindore të Maqedonisë. Sipas të dhënave, gjatë vitit të kaluar më shumë se dhjetë fabrika tekstili në rajonin e Shtipit, Koçanit dhe Dellçevës kanë ndërprerë punën, duke lënë shumë punëtorë pa punë dhe pa pagesat që u takojnë.