Sot në Shkup u mbajt Kampionati Shtetëror i karatesë për seniorë, njëkohësisht edhe faza “Play-off” për të njëjtat kategori, ku morën pjesë garues nga 27 klube të vendit. Në mesin e tyre ishin edhe dy garuesit e klubit të karatesë “Uskana” nga Kërçova, Nuredin Dervishi dhe Blerina Zendeli, të udhëhequr nga trajneri i klubit, prof. Nexhbi Dervishi.

Nuredin Dervishi, në një konkurrencë shumë të fortë, arriti të fitojë të gjithë kundërshtarët me rezultate bindëse, duke u shpallur kampion shtetëror. Ai po ashtu e konfirmoi epërsinë e tij edhe në fazën “Play-off”, ku siguroi kualifikimin për të përfaqësuar shtetin në Kampionatin Evropian të karatesë, i cili do të mbahet në muajin maj në Frankfurt të Gjermanisë.

Ndërkohë, Blerina Zendeli, përkundër një paraqitjeje të mirë në një konkurrencë të ashpër, u rendit e treta në kategorinë e saj, si në kampionatin shtetëror ashtu edhe në “Play-off”. Megjithatë, ajo nuk arriti të sigurojë të drejtën për pjesëmarrje në Kampionatin Evropian.

Në këtë kampionat shtetëror dhe fazën “Play-off” për seniorë, e deleguar për referim ishte edhe trajnerja e klubit, zonja Jetmira Dervishi.