Një moment i rrallë dhe i pabesueshëm ka ndodhur në çerekfinalen e parë të UEFA Europa League, ku FC Porto dhe Nottingham Forest u ndanë në një ndeshje dramatike që përfundoi me barazim.

Porto kishte kaluar në avantazh në minutën e 11-të me golin e Ëilliam Gomes, duke krijuar përshtypjen se do të kontrollonte ndeshjen në “Estádio do Dragão”. Megjithatë, gjithçka ndryshoi vetëm dy minuta më vonë pas një gabimi të pabesueshëm në mbrojtje.

Mbrojtësi i ri, Martim Fernandes, nën presion minimal, tentoi një pasim rutinë drejt portierit Diogo Costa, por goditja e tij u kthye në një autogol spektakolar nga rreth 40 metra distancë. Topi fluturoi mbi fushë dhe përfundoi në rrjetë, duke lënë të shtangur stadiumin dhe duke i dhënë një dhuratë të madhe skuadrës angleze.

Ky episod i çuditshëm ndryshoi rrjedhën e ndeshjes, me Nottingham Forest që përfitoi maksimalisht nga momenti i gabimit. Pamjet e autogolit kanë bërë xhiron e rrjeteve sociale, duke u cilësuar si një nga gafat më të pazakonta të këtij sezoni në Europë.

Ndeshja e parë përfundoi pa fitues, duke lënë gjithçka të hapur për takimin e kthimit në Angli.