Po përgatitet një Ligj i ri për postat i cili duhet ta rregullojë kaosin në biznesin postar në vend. Në shekullin 21 qytetarët e Maqedonisë me muaj enden nëpër labirinte burokratike për t’i gjetur dërgesat e tyre postare. Më tragjikja është se derisa i marrin njoftimet nga gjykata apo noteri, disa prej tyre tashmë u kanë skaduar edhe afatet ligjore për ankesa ndaj vendimeve. Po pse Posta e Maqedonisë del me humbje, ndërsa postat private kanë edhe rritje 100 për qind të fitimeve?! Cilat janë mangësitë dhe çfarë duhet të sjellë ligji i ri ishte tema e emisionit “Biznes 21”. Sipas përfaqësuesit nga Posta e Maqedonisë, ankesat më së shumti vijnë nga qytetarët e Shkupit ku është pjesa më e madhe e tregut.

“Nuk kemi ne ndonjë vonesë siç paraqitet në media. Ja për shembull, nuk ka përfaqësues nga Agjencia e Postave, do të thotë informacionet tani… po të kishte përfaqësues, do të thoshte se në baza ditore ata marrin ankesa nga Posta e Maqedonisë rreth dhjetë”, tha Nikolço Ugrinov – zëvendësdrejtor në Postën e Maqedonisë.

Nuk ka vonesa në doganë – sigurojnë nga Drejtoria e Doganave. Problemin e shohin te dorëzimi i njoftimit për qytetarët se duhet të paguajnë detyrimet. Që nga dhjetori i kaluar për dërgesat deri në 22 euro tani paguhet TVSH, ndërsa TVSH dhe doganë për të gjitha mbi 90 euro.

“Procedurat doganore përfundojnë brenda të njëjtës ditë nëse nuk ka asnjë problem me dërgesën. Ndoshta më shumë problemi, pra zvarritja, është koha derisa personat fizikë dhe juridikë të njoftohen se u ka mbërritur dërgesa, që të paraqiten dhe të mund t’i kryejnë formalitetet dhe procedurat doganore”, theksoi Mitko Dimitrovski – ndihmësdrejtor për sisteme doganore në Drejtorinë e Doganave.

Strategji shtetërore dhe një “reset” i plotë i gjithë sistemit të trashëguar nga Jugosllavia kërkojnë postat private. Thonë se në kohë të teknologjisë së avancuar, neve na ndodh erozion, ndërsa për shkak të pozitës së mirë gjeografike mund të jemi qendër shërbimi dhe të përfitojmë. Reagojnë ndaj konkurrencës së pandershme, ndryshimit të shpeshtë të rrugëve dhe faktit që qytetarët duhet të kenë, por nuk kanë kuti postare.

“Nuk na ndihmoi shteti të përballemi me ekonominë gri. Do t’ju tregoj incizime në Manastir, vetëm në mëngjes 100 dërgesa shkojnë me autobusë dhe taksistë. Këtu te stacioni i autobusëve jepen, askush nuk lëviz as gishtin e vogël dhe kjo vazhdon në mënyrë kronike. Si t’ju them, ndaluni në rrugë te “Partizani I”, do t’ju tregoj tre-katër pika ku lënë dhe marrin”, tha Igor Geshkovski – pronar i “Eko logistik servis”.

Ka shumë ankesa dhe kërkesa për dëmshpërblim për dërgesa të humbura, por duhet të punohet për më shumë informim të qytetarëve për të drejtat e tyre, thonë nga Komiteti Teknik për Postat.

“Për shembull, nëse unë dërgoj një telefon prej 1.000 eurosh, por vendos vlerë 1.000 denarë, këtu do të dëmtohet vetë dërguesi. Prandaj është shumë e rëndësishme, po ata mund të kërkojnë, kam telefon prej 1.000 eurosh, por nëse unë vendos vlerë 1.000 denarë, këtu diferenca është e madhe dhe nuk kanë të drejtë ankese më pas…”, tha Monika Ivanovska – kryetare e Komitetit teknik për postat.

Sigurojnë se me ligjin e ri për postat do të vendoset rregull në biznesin postar në vend.