Në Ditën Ndërkombëtare të Monumenteve, është prezantuar përfundimi i restaurimit të plotë të fasadës së Muzeut Historik Kombëtar, një nga institucionet më të rëndësishme të trashëgimisë kulturore në vend.

Ministri Blendi Gonxhja bëri të ditur se ndërhyrja përfaqëson një moment të rëndësishëm në procesin e rikonstruksionit dhe konservimit të këtij monumenti kulture të kategorisë së dytë.

Restaurimi i fasadës vjen pas përfundimit të punimeve në mozaikun monumental, të realizuar në kuadër të programit EU4Culture, i financuar nga Bashkimi Evropian dhe i zbatuar nga UNOPS.

Postimi i ministrit

Zbulohet fasada e Muzeut Historik Kombëtar pas përfundimit të restaurimit të plotë të saj, duke shënuar një moment të rëndësishëm në procesin kompleks të rikonstruksionit dhe konservimit të këtij monumenti kulture të kategorisë së II-të. Pas përfundimit të restaurimit të mozaikut monumental në kuadër të projektit të parë të programit EU4Culture, financuar nga Bashkimi Evropian dhe zbatuar nga UNOPS, tashmë finalizohet edhe ndërhyrja në të gjithë fasadën, duke garantuar ruajtjen e vlerave historike dhe arkitektonike të godinës dhe duke hapur rrugën për vijimin e fazave të mëtejshme të përforcimit struktural, rimuzealizimit dhe rikonceptimit të institucionit.