Interi është një hap më pranë fitimit të titullit në Serie A, pasi mposhti Cagliari-n me rezultatin bindës 3-0 në “San Siro”, duke krijuar një diferencë prej 12 pikësh në krye të renditjes.

Pjesa e parë ishte më e vështirë për zikaltrit, të cilët dominuan por nuk arritën të konkretizonin rastet. 

Në minutat e para, një aksion i shpejtë mes Marcus Thuram dhe Francesco Pio Esposito çoi te Federico Dimarco, por tentativa e tij u ndal heroikisht në vijën e portës nga Michel Adopo.

Pak para pushimit, edhe Esposito pati një mundësi të artë, por portieri Elia Caprile reagoi në mënyrë të shkëlqyer.

Gjithçka ndryshoi në pjesën e dytë, ku Interi u shfaq shumë më i vendosur. Në minutën e 52-të, Thuram zhbllokoi ndeshjen pas një pasimi të bukur nga Dimarco. Vetëm katër minuta më vonë, Nicolò Barella dyfishoi shifrat me një goditje spektakolare, duke i dhënë qetësi ekipit të tij.

Goli i dytë demoralizoi plotësisht Cagliari-n, ndërsa në fund Piotr Zieliński vulosi rezultatin 3-0 me një finalizim cilësor. Kjo ishte fitorja e tretë radhazi për Interin, që tashmë sheh shumë pranë triumfin në kampionat.

Ndërkohë, Cagliari mbetet në vendin e 16-të, gjashtë pikë larg zonës së rënies, duke hyrë në fazën vendimtare të sezonit. Interi tashmë do të përqendrohet te Kupa e Italisë, ku do të përballet me Comon në gjysmëfinale.