Kryetari i BDI në Tetovë, Bajram Rexhepi, ka reaguar lidhur me gjendjen në Gjimnazi i Tetovës, duke e cilësuar atë si shqetësuese dhe të papranueshme.

Sipas Rexhepit, institucioni që dikur ishte simbol i dijes dhe krenarisë sot përballet me neglizhencë të theksuar dhe mungesë mirëmbajtjeje. Ai theksoi se oborri i shkollës është i mbushur me mbeturina, hapësirat sportive janë degraduar, ndërsa ambientet përreth nuk ofrojnë kushte të denja për nxënësit.

“Nxënësve po u mohohet e drejta për një ambient të shëndetshëm dhe për zhvillim të rregullt fizik e edukativ. Kjo situatë kërkon ndërhyrje të menjëhershme,” u shpreh Rexhepi.

Ai kritikoi gjithashtu institucionet përgjegjëse për mungesë veprimi dhe strategjie, duke theksuar se investimi në arsim duhet të jetë prioritet.

“Është e papranueshme që një shkollë me këtë histori dhe rëndësi të lihet në këtë gjendje. Të rinjtë tanë meritojnë kushte dinjitoze dhe mbështetje reale për zhvillimin e tyre,” shtoi ai.

Rexhepi bëri thirrje për masa konkrete dhe urgjente nga autoritetet lokale, duke kërkuar përmirësim të kushteve në shkollë dhe rikthimin e saj në nivelin që meriton.

Ja postimi plotë:

GJIMNAZI I TETOVËS, NGA INSTITUCION ELITAR NË NJË REALITET TRONDITËS 

Shkolla e mesme ku dikur edhe unë mësova, sot është shndërruar në një pamje që të kujton skena filmash horror.

Gjimnazi i Tetovës, dikur simbol i dijes dhe krenarisë, sot është lënë në mëshirë të fatit. Oborri i mbushur me mbeturina, fushat sportive të shndërruara në parkingje të egra, dhe hapësirat e gjelbra që po kthehen në strehë për qen endacakë.

Salla sportive, që duhet të jetë në shërbim të nxënësve, qëndron e mbyllur dhe jashtë funksionit. Fëmijëve u mohohet e drejta për sport, për zhvillim dhe rekreim dhe për një ambient të denjë shkollor.

Kjo është pasojë direkte e një udhëheqjeje pa vizion, pa përgjegjësi dhe pa ndjenjë elementare për arsimin.

Komuna e Tetovës, në vend që të investojë në të ardhmen e të rinjve, është zhytur në korrupsion dhe shërben interesat e një rrethi të ngushtë, mafias urbane, ndërsa institucionet publike degradojnë çdo ditë.

Improvizim, mungesë totale strategjie zhvillimore dhe një realitet i hidhur, korrupsion dhe shpërfillje ndaj arsimit.

Nxënësit dhe fëmijët tanë meritojnë shkolla dhe arsim dinjitoz!