Në suaza të Takimeve Pranverore të Bankës Botërore dhe Fondit Monetar Ndërkombëtar në Uashington, ministrja e Financave Gordana Dimitrieska-Koçoska u takua me nënkryetaren rajonale të Bankës Botërore për Evropën dhe Azinë Qendrore Antonela Basani, drejtoreshën rajonale për Ballkanin Perëndimor Shiaoçin Ju, drejtorin ekzekutiv Juxhin Rugenaat dhe drejtoreshën e Zyrës së Bankës Botërore për Kosovën dhe Republikën e Maqedonisë së Veriut Kerol Mezhevan.

Gjatë takimit , informojnë nga Kabineti i Dimitrieska-Koçoska u diskutua për bashkëpunimin e deritanishëm midis Maqedonisë dhe Bankës Botërore, ku u theksua se ky institucion financiar ndërkombëtar mbetet një nga partnerët më të rëndësishëm të vendit në përkrahjen e politikave zhvillimore, reformave institucionale dhe investimeve kapitale.

“Bashkëbiseduesit shqyrtuan edhe portofolin aktual të projekteve aktive, të cilat orientohen drejt përmirësimit të financave publike, modernizimit të infrastrukturës, efikasitetit energjetik, arsimit, mbrojtjes sociale dhe bujqësisë. Vëmendje e veçantë iu kushtua edhe zbatimit të Kornizës së partneritetit me Bankën Botërore për periudhën 2024-2028, e cila parashikon përkrahje të konsiderueshme financiare dhe teknike për vendin në periudhën e ardhshme”, theksohet në kumtesë.

Në këtë drejtim, u theksua se prioritetet kryesore mbeten përmirësimi i cilësisë së shërbimeve publike, krijimi i kushteve për një sektor privat më produktiv, krijimi i vendeve të reja të punës, si dhe rritja e qëndrueshmërisë së ekonomisë ndaj sfidave klimatike.

Ministrja Dimitrieska-Koçoska theksoi se Qeveria mbetet e përkushtuar në zbatimin e reformave që do të sigurojnë ruajtjen e stabilitetit makroekonomik, financa publike të qëndrueshme dhe përmirësimin e standardit jetësor të qytetarëve. Ajo potencoi se partneriteti me Bankën Botërore ka rol të veçantë në zbatimin e reformave strukturore dhe në realizimin e investimeve strategjike të cilat duhet të kontribuojnë në rritjen ekonomike afatgjate dhe konkurrencën më të madhe ekonomike.

Gjatë bisedimeve u hap edhe çështja e bashkëpunimit në të ardhmen mes vendit tonë dhe Bankës Botërore, ku u shqyrtuan mundësitë për përkrahjen e investimeve të reja strategjike, si dhe përkrahjen e mundshme buxhetore lidhur me zbatimin e proceseve reformuese. Interes i veçantë u theksua për projektet në fushat e energjetikës, infrastrukturës dhe modernizimin e sektorit publik, me qëllim të krijimit të rritjes së qëndrueshme ekonomike dhe rezistencës më të madhe të ekonomisë ndaj sfidave të jashtme.

Gjatë takimit u fol edhe për mundësitë e shfrytëzimit të instrumenteve të reja financiare që do të ofronin përkrahje shtesë për agjendën reformuese të vendit, si dhe për realizimin e projekteve që kanë rëndësi afatgjate në zhvillimin ekonomik.

Përfaqësuesit e Bankës Botërore përgëzuan angazhimin e Qeverisë për vazhdimin e reformave dhe konfirmuan gatishmërinë e institucionit edhe në periudhën e ardhshme për sigurimin e ekspertëve dhe përkrahjen financiare për zbatimin e prioriteteve zhvillimore të vendit.

Në takim, përveç ministres, mori pjesë edhe guvernatori i Bankës Popullore, Trajko Sllaveski.