Në një moment kur kufijtë mes fantashkencës dhe realitetit po bëhen gjithnjë e më të hollë, kompania kineze XPeng AeroHT po bën ndoshta hapin më konkret drejt epokës së makinave fluturuese. Modeli i saj “Land Aircraft Carrier”, i prezantuar para publikut në Guangzhou dhe në Ekspozitën Ndërkombëtare prestigjioze të Aviacionit dhe Hapësirës në Kinë (China International Aviation and Aerospace Exhibition), simbolizon ambicien për një teknologji që për dekada ekzistoi kryesisht në teori.
Siç raporton televizioni kinez CGTN, bëhet fjalë për një qasje krejtësisht ndryshe në zhvillimin e makinave fluturuese. Në vend të një automjeti të vetëm që kombinon njëkohësisht lëvizjen në rrugë dhe fluturimin, “XPeng” ka zhvilluar një sistem modular të përbërë nga dy njësi të ndara: një transportues amë dhe një mjet fluturues. I ashtuquajturi “Anija amë” (“Mother ship”), përfaqëson një automjet të madh me gjashtë rrota në formë furgoni, me gjatësi rreth 5,5 metra dhe tre akse, i pajisur me një sistem hibrid EREV bazuar në një sistem elektrik 800-voltësh, i cili mundëson autonomi deri në 1.000 kilometra. Brenda automjetit është vendosur një mjet fluturues kompakt, i ngjashëm me një dron të madh, i cili është projektuar për transportin e dy personave.
Mjeti fluturues aktivizohet me një shtypje të thjeshtë të butonit, pas së cilës shkëputet automatikisht nga “transportuesi amë” dhe fillon fluturimin e pavarur. Procesi i kthimit dhe rikthimit në automjet zgjat rreth pesë minuta. Me një karikim të vetëm, sistemi mundëson kryerjen e pesë deri në gjashtë fluturimeve, ndërsa shpejtësia maksimale arrin rreth 360 kilometra në orë, gjë që e rendit atë ndër projektet më ambicioze në fushën e mjeteve elektrike me ngritje vertikale (eVTOL).
Vëmendje të veçantë tërheq shkalla e lartë e autonomisë. Gjatë fluturimit demonstrues, mjeti fluturoi në mënyrë të pavarur duke kryer disa manovra, përfshirë nxitimin në lartësi të ulët, uljen e kontrolluar me shpejtësi konstante dhe uljen precize, pa pjesëmarrjen direkte të një piloti. Sistemi mbështet si regjimin automatik, ashtu edhe atë manual të punës. Në regjimin automatik, mjeti menaxhon planifikimin e rrugës, fluturimin kroçerë (cruise), kthimin me një komandë të vetme dhe uljen, ndërsa në regjimin manual përdoret një sistem kontrolli i thjeshtuar me një levë drejtuese (joystick), gjë që e thjeshton ndjeshëm kontrollin në krahasim me helikopterët klasikë. Sipas të dhënave nga kompania, trajnimi bazë për drejtimin e mjetit mund të zotërohet për rreth tre orë.
Çmimi për këtë automjet të së ardhmes vlerësohet rreth 276.000 dollarë, dhe interesi në treg është tashmë i konsiderueshëm. Pas fluturimit të parë publik demonstrues, janë regjistruar më shumë se 2.000 porosi. Kjo kompani, e cila operon që nga viti 2013, më parë kishte zhvilluar një koncept për një automjet fluturues me helika të palosshme të integruara në karroceri, por për shkak të sfidave teknike, përfshirë dridhjet gjatë vozitjes, kaloi në zgjidhjen modulare.
“Por ambiciet e firmës nuk përfundojnë këtu. Demonstrimet në Guangzhou dhe në panairin ndërkombëtar të aviacionit janë një tregues i qartë i drejtimit në të cilin po lëviz e ardhmja e mobilitetit urban”, raportoi CGTN.
“XPeng” ka nisur tashmë ndërtimin e një fabrike prodhimi në Guangzhou, e projektuar me një kapacitet deri në 10.000 makina fluturuese në vit, ndërsa dërgesat e para te blerësit priten gjatë vitit 2026.
