Me rastin e Ditës Ndërkombëtare të Librit, Kuvendi organizoi promovimin e botimit “Komisionet e parlamentit shqiptar ndër vite (1920–2025)”.

Në aktivitetin e organizuar nga Shërbimi i Bibliotekës dhe Botimeve Parlamentare, ishin të ftuar personalitete të botës akademike, si prof. dr. Teki Kurti, prof. dr. Artur Ribaj, deputetja Greta Bardeli, pjesë e Sekretariatit për Kërkimin Parlamentar, Bibliotekën dhe Botimet Parlamentare, deputetë të tjerë, studentë të Universitetit Mesdhetar etj.

Në fjalën e saj përshëndetëse, Greta Bardeli theksoi rëndësinë dhe peshën e librit në jetën e gjithsecilit, në mënyrë të veçantë për të rinjtë studentë, që janë në rrugën e formimit akademik.

Ajo i vlerësoi botimet parlamentare jo vetëm si dokumente institucionale që pasqyrojnë vendimmarrjen dhe kulturën demokratike, me peshë në transparencën dhe llogaridhënien ndaj qytetarëve, por edhe si ura lidhëse mes institucioneve dhe publikut, duke mbetur një burim i rëndësishëm për studiuesit, juristët, akademikët dhe studentët.

Në këtë kontekst, u ndërmor edhe iniciativa për botimin “Komisionet e parlamentit shqiptar ndër vite (1920–2025)”.

Me të dhënat e veprimtarisë së komisioneve parlamentare ndër vite të paraqitura në këtë botim plotësohet korniza historike dokumentare e zhvillimit të parlamentarizmit shqiptar nga viti 1920 deri në vitin 2025. “Komisionet e parlamentit shqiptar ndër vite (1920–2025)” është një botim komplementar i “Ligjvënësit shqiptarë dhe firmëtarët e Aktit të Pavarësisë (1912–2021”, një botim që përfshin të dhëna në më shumë se një shekull.

Mes të tjerave prof. dr. Teki Kurti, edhe në cilësinë e recensuesit të botimit, theksoi se, “ky botim institucional ka një rëndësi të veçantë, pasi dokumenton zhvillimin kronologjik të komisioneve parlamentare nga viti 1920, kur u hodhën themelet e parlamentarizmit shqiptar, deri në vitin 2025. Në këtë botim njihemi me komisionet parlamentare që kanë funksionuar në çdo legjislaturë të parlamentit shqiptar gjatë gjithë periudhës 1920–2025 dhe anëtarësinë e tyre, me ndryshimet që janë bërë jo vetëm nga legjislatura në legjislaturë, por edhe nga njëri sesion në tjetrin”.

Ndërsa prof. dr. Artur Ribaj u ndal në rolin e botimeve parlamentare në rritjen e besimit të investitorëve vendas, ndërkombëtarë dhe të diasporës.

“Përmes publikimit të artikujve analitikë, studimeve krahasuese dhe raporteve të mirëstrukturuara parlamenti mund të kontribuojë në mënyrë të drejtpërdrejtë në rritjen e transparencës, të llogaridhënies dhe të cilësisë së qeverisjes në sektorin publik dhe atë privat, duke krijuar një mjedis më të parashikueshëm dhe më tërheqës për investime”, u shpreh ndër të tjera prof. Ribaj.

Kjo vjen edhe për shkak të rëndësisë së veprimtarisë së komisioneve parlamentare, të cilat janë motori që vë në lëvizje punën e Kuvendit dhe reflektojnë interesat e elektoratit përmes përfaqësuesve të tij të zgjedhur.

Në fjalën e saj, Lidra Bushati, drejtore e Shërbimit të Botimeve dhe Bibliotekës Parlamentare, theksoi se një ndër qëllimet e këtij botimi është dokumentimi i kronologjisë së ecurisë së komisioneve parlamentare, mënyrës së organizimit dhe përbërjes, legjislaturave dhe kohëzgjatjeve, deputetëve dhe grupimeve të tyre politike si dhe organeve ligjvënëse në përputhje me ndryshimet politike që kanë ndodhur, duke dhënë një informacion më të plotë për veprimtarinë e parlamentit shqiptar në faza të ndryshme të historisë së tij.

Ky botim është një informacion me vlerë historike-dokumentare për studentët dhe studiuesit, të cilët mund t’i vendosin këto të dhëna në një rrafsh krahasues dhe analitik edhe me vendet e zhvilluara për aspektet kryesore që e veçojnë Kuvendin e Shqipërisë dhe kulturën e tij legjislative. Mund të shërbejë edhe si referencë për studime në fushat e drejtësisë, historisë dhe shkencave politike.

Gjithashtu është një vlerë e shtuar në fondin e Bibliotekës së Kuvendit të Shqipërisë.