Historia thërret sërish, derbi ndez kryeqytetin, por për fakt të keq nuk luhet më për titull, por për të mbijetuar, të paktën për Tiranën, me bardheblute që kërkojnë pikët e plota përballë Partizanit për t’iu larguar zonës së ftohtë. Orges Shehi, nuk driblon peshën e këtij takimi, e pranon që është një ndeshje vendimtare, për këtë arsye zbresin në fushë për t’i marrë maksimumin këtij takimi:

Si duket gjendja e ekipit? Gjendja është e mirë, edhe fizike dhe psikologjike. Na pret ndeshje e rëndësishme dhe duhet ta përgatisim me qetësi.

Dëmtimet dhe rikuperimet? E gjithë skuadra është e plotë. Dhe ndonjëri që ka pasur probleme fizike, jemi munduar ta menaxhojmë mirë për të qenë gati për nesër.

I vështirë derbi kur je në luftë për mbijetesë, apo kur synon titullin? Derbi ka dozë emocionale të madhe. Patjetër që në pozicionin ku jemi kërkojmë të marrim maksimumin, për t’u shmangur dhe për t’u shkëputur nga zona ku jemi. Klasifikimi zërohet në derbi. Të gjithë kërkojnë të japin maksimumin, për të arritur pritshmëritë e të gjithë njerëzve që do jenë të shumtë në stadium dhe ekran duke ndjekur skuadrën e tyre.

Aleancat? Ne duhet të jemi të përqëndruar te fusha siç kemi bërë të gjithë këto takime, jo te kundërshtari. Pa menduar alencat. Nuk është se jam person që i vë re shumë këto gjëra. Shumë flitet, por fusha është fokusi ynë kryesor.

Derbi vendimtar? Kanë mbetur katër javë, çdo ndeshje është vendimtare. Sa kalojnë javët, nuk ke ku rikuperon pikë më. Mendoj se është ndeshje vendimtare, por pa na ngarkuar shumë. Nëse do ngarkohemi shumë, performanca e secilit nuk është ajo që pritet. Duhet të kemi ekuilibër emocional, e dimë që është ndeshje e rëndësishme për ne.

Diferencë mes Partizanit dhe Dinamos? Të gjithë skuadrat kanë pikat e forta të tyre dhe të dobëta. Janë dy skuadra që kanë kontingjent, histori dhe fanellë të rëndësishme në kampionatin tonë. Në këtë situatë ku jemi, çdo pikë është shumë e vlefshme. Me Dinamon mund të fitonim nëse nuk merrnim gol shpejt, por edhe mund ta humbisnim. Pra fati ishte me ne. Do vazhdojmë të kërkojmë atë që i themi gjithmonë skuadrës, të japim maksimumin tonë përballë çdo kundërshtari. Aq më tepër në pozicionin ku jemi. Pastaj të kërkojmë të kemi edhe fatin me vete.

Tirana duhet ta shmangë “play out”? Deri në fund kur jepen verdiktet janë edhe katër ndeshje, pra 12 pikë. Kërkoj të marrim maksimumin tonë nga çdo takim, duke filluar nga nesër. Në fund fare do bëhen llogaritë se ku do pozicionohemi.

Fitore? Personalisht, u kam thënë edhe lojtarëve se derbi është një ndeshje që kërkohet gjithmonë të luftohet dhe fitohet. Më e rëndësishme është që të shijohet. Derbin e fundit kam qenë nga krahu tjetër, kam qenë trajner i Partizanit dhe i fitova të dyja derbit. Mendoj se është ndeshje që ne si staf duhet t’i transmetojmë lojtarëve, që mezi e presim. Ndeshje që luftohet, shijohet dhe në fund fare çfarë të prodhojë fusha.

Kalendari? Mendoj se çdo skuadër, duke parë objektivat, skemën dhe sistemin që këtë vit ka ndryshuar, çdo skuadër ka objektivat e veta. Kjo e bën që të gjitha ndeshjet të jenë të luftuara. Prej dy javësh përballemi me skuadra që janë në kreun e klasifikimit. Do duhet të menaxhojmë dozën emocionale dhe presionin.

Kush e fiton kampionatin? Nuk ka shumë interes për mua personalisht. Nuk ka asnjë interes dhe fokus se kush do e fitojë. Fokusi është te skuadra jonë, që të dalim nga kjo situatë.

Momenti më i mirë për derbin? Klasifikimi nuk luan rol të rëndësishëm. Kjo ndeshje na ka kapur në situatë të mirë sepse kemi pasur pesë ndeshje pa humbje. Do mundohemi të përqëndrohemi vetëm te skuadra jonë. Këtë moment të mirë që kemi, shpresojmë ta vazhdojmë sepse e dimë që do jetë shumë i rëndësishëm për vazhdimësinë.

Fitorja për objektiv personal? Nuk ka ndeshje personale me askënd. Aq më tepër te Partizani ku kam dal nënkampion. Lojtarët kanë dyluftime të veçanta në çdo sektor të fushës. Nuk do kërkoja që fokusin ta hedh te vetja ime, e shkuara apo ardhmja ime.

Ndryshe nga Tirana, për Partizanin në “valle” është prezenca në FINAL4. Trajneri Kërnaja u shpreh në konferencë për shtyp se ekipi është i karikuar në maksimumin për këtë derbi:

Si duket gjendja ekipit në prag të derbit?

Kuptohet derbi, ana emocionale djemtë janë në maksimumin e mundshëm, dëshira është në kufijtë e tyre. Besoj se nuk ka nevojë për ndonjë shtysë kjo ndeshje. Të gjithë duhet ta luajmë dhe ta shijojmë, sigurisht që dhe ta fitojmë. Ana fizike është e mirë, djemtë vrapojnë, jemi stërvitur në rregull dhe presim nesër ditën e ndeshjes.

Sa i përket situatës së dëmtimeve apo rikthimeve?

Dëmtime nuk ka. Rikthime mund të jetë ndonjë emër i ri, ndoshta ta shikojmë edhe sot në stërvitje. Për mungesa dihet kartonat e ndeshjes së fundit, janë Ismaili dhe Bytyçi zyrtare. Pjesa tjetër është e gatshme.

Ku është presioni më i madh?

Historia ka treguar që në derbi nuk shikohet renditja, nuk shikohet forma, nuk shikohet momenti. Shikohet vetëm dita e ndeshjes. Disa herë mund të ketë fituar edhe ekipi që nuk renditet më mirë, ose ekipi që vjen nga një gjendje jo e mirë. Të themi të drejtën, ndoshta nëse do merren vetëm 5 javët e fundit, Tirana vjen me një gjendje më të mirë se ne. Me anë të pikëve, jo të lojës. Ka marrë më shumë pikë se ne, por nëse shohim 14-15 javët e fundit duke filluar pas janarit, ne jemi ndër ekipet që kemi rezultatet më të mira. Kemi vetëm dy humbje dhe këto janë ndaj dy ekipeve kryesuese, Vllaznisë dhe Elbasanit. Derbi është tjetër gjë nuk shikohen fare as statistikat, as renditja, as pikët. Derbi është aty për tu luajtur dhe për t’u fituar për tifozët.

Çfarë folët me tifozët pas Bylisit?

Me tifozët sigurisht që kemi marrëdhënie shumë të mirë, i falenderoj për pjesmarrjen. Nëse në këto tri javë nuk kanë qenë rezultet që kemi pritur, ata janë për tu duartrokitur kanë qenë të shumtë prezent. Ka qenë një bisedë mes miqsh ,që ne do japim maksimumin si në derbi si në çdo ndeshje tjetër. Kështu që ne hyjmë edhe nesër për të dhënë maksimumin në fushë. Kjo ka qenë e gjitha.

Si do zgjidhet derbi?

Nuk besoj se ka një dominim të madh në derbi, nuk ka patur asnjëherë. Edhe në derbin tonë të fundit kemi dominuar për 70 minuta, pastaj pjesën e fundit ka patur Tirana më shumë përparësi. Sigurisht edhe nga rezultati. Në derbi ka të bëj shumë faktori, qasja e djemve. Ndoshta shumë më pak do hyjmë në skemat dhe studimet tona, por ka të bëj më shumë qasja në këtë ndeshje.

Deklarata e presidentit në derbin e kaluar?

Presidenti mund të thotë që kampionati nuk ka kuptim pa derbi, por sigurisht që nuk lidhet me ndeshjen tonë. Sigurisht që nuk lidhet. Ne shohim vetëm objektivat tona do hyjmë për ta fituar, pjesa tjetër i takon fushës. Sigurisht do hyjmë si në çdo ndeshje për ta fituar e riktheksoj. Nëse në ndonjë ndeshje tjetër djemtë duhet të kenë ndonjë motiv kjo ndeshje nuk ka nevojë për motivim shtesë sepse e ka vetë motivimin brenda. Kështu që hyjmë për ta fituar.

Çfarë prisni te ky derbi?

Shpresoj të jetë i njëjti rezultat si në dy derbit e fundit, 0-2.