Sezoni turistik po afron dhe përgatitjet për mirëpritjen e vizitorëve kanë nisur me aksione pastrimi në zonat bregdetare.

Në Velipojë dhe Shirokë u zhvillua një aksion masiv për pastrimin e mjedisit, ku u angazhuan përfaqësues të autoriteteve dhe strukturave përgjegjëse për mjedisin, shkruan rtsh.al.

Vëmendje e veçantë iu kushtua pastrimit të grykëderdhjes së Bunës, një zonë e ndjeshme ekologjikisht, ndërsa u bë thirrje që qytetarët të kontribuojnë në mbajtjen e mjedisit të pastër.

Kryeministri Edi Rama, përmes një postimi në rrjetet sociale, ndau pamje nga aksioni i pastrimit, duke e nisur ditën me mesazhin e tij.

“Mirëmëngjes dhe me këto momente nga pastrimi masiv në bregdetin e Velipojës dhe në Shirokë, ju uroj një fundjavë të mbarë.”

Veç Velipojës, aksione pastrimi janë ndërmarrë edhe në destinacione të tjera turistike të Shkodrës, me synimin që vizitorëve t’u ofrohet një mjedis sa më i pastër dhe i rregulluar në prag të sezonit veror.