Në çdo episod të “Top Tech” me Mateo Kadriun zbulojmë të rejat më të fundit nga bota e madhe e teknologjisë. Me informacione dhe gjithçka të detajuar rreth risive dhe mundësive që po na ofrohen çdo ditë sidomos nga Inteligjenca Artificiale me avancimin e projekteve nga më të ndryshme.

Jeff Bezos, ai burri që ben te mundur sjelljen e porosive në shtëpi për dy ditë, këtë javë lëshoi raketën e tij New Glenn nga Florida. Dhe rezultati? Si të porositësh diçka në Amazon — gjysma erdhi siç duhet, gjysma jo aty ku duhej.
Të dielën, më 19 prill, raketa e Blue Origin u ngrit nga Cape Canaveral. Misioni kishte dy gjëra për të bërë: e para, të kthente boosterin në tokë për ta ripërdorur, dhe e dyta, të çonte në orbitë një satelit gjigant të kompanisë AST SpaceMobile. Boosterin e ulën me sukses në mes të Atlantikut, mbi një anije që Bezos e ka pagëzuar me emrin e mamasë së tij. Po, ndërsa ne nuk dimë çfarë t’i blejmë mamit për ditëlindje, ky njeri ia ka vendosur emrin e saj, një varke që kap raketat në mes të oqeanit.
Po satelitin? Aty puna u ngatërrua. Raketa e la satelitin në një orbitë “më të ulët se sa ishte planifikuar” — që në gjuhën e inxhinierëve do të thotë “ups”. Sateliti u ndez, funksionoi për disa sekonda, kuptoi që ishte shumë afër Tokës, dhe tani kompania duhet ta rrëzojë vetë para se të rrëzohet vetvetiu. Mirë që e kishin të siguruar — sepse ky satelit ishte sa madhësia e një apartamenti me dy dhoma në Tiranë.
Por le të jemi të sinqertë — Blue Origin po mëson. Ripërdorimi i boosterit është gjë e madhe, sepse deri tani vetëm SpaceX e Elon Musk-ut e bënte këtë. Pra Bezos po kapet pas Musk-ut ngadalë, hap pas hapi, satelit pas sateliti…. të gabuar.
Raketa quhet “Never Tell Me the Odds” — frazë nga Star Wars. Dhe sinqerisht, pas këtij misioni, mendoj se as Bezos nuk dëshiron të dijë probabilitetet.