Elland Road u shndërrua në festë të kuqe dhe të verdhë të premten në mbrëmje.

Leeds United mposhti Burnleyn me rezultatin 3-1 në ndeshjen që hapi javën e 35-të të Premier League, duke i dhënë ekipit të trajnerit Daniel Farke një asist të rëndësishëm për qëndrimin në elitën e futbollit anglez. Me 43 pikë tashmë dhe një diferencë prej +9 pikësh nga zona e rrezikut, ndërkohë që kanë edhe një ndeshje më pak të luajtur, Leeds mund të festojë me siguri.

Për Burnleyn, në anën tjetër, ky ishte edhe një hap tjetër drejt asaj kategorisë inferiore. Ekipi i Turf Moor e sheh sezonin duke u mbyllur me zhgënjim të thellë, si në rezultate ashtu edhe jashtë fushës, ku largimi i trajnerit Scott Parker la pas një boshllëk drejtimi në momentin më të vështirë.

Mes atyre që ndoqën ndeshjen kryesisht nga stoli ishte edhe Armando Broja, i cili gjithësesi u aktivizua në fund për të luajtur rreth 14 minuta, por pa lënë asnjë shenjë. Sulmuesi i kombëtares shqiptare, 24 vjeç, u transferua te Burnley në gusht të vitit 2025 me një kontratë pesëvjeçare dhe për një shumë prej rreth 20 milionë stërlinash. Por sezoni nuk ka shkuar siç pritej, Broja ka grumbulluar vetëm 835 minuta lojë në Premier League, me 1 gol dhe 1 asist. Gjatë pesë ndeshjeve të fundit të Parker si trajner, sulmuesi shqiptar ka luajtur më pak se 30 minuta në total.

Tani, me rënien e Burnleyt, pyetja nuk është më nëse Broja do të largohet, por ku do të shkojë. Klube italiane të Serie A si Parma dhe Udinese kanë shfaqur interes për sulmuesin shqiptar, me mundësinë e një huazimi si skenarin më të besueshëm. Aventura angleze e Brojës te Burnley ka qenë një tjetër kapitull i dhimbshëm në karrierën e një lojtari që talentin e ka, por fatin s’e gjen dot.