Ali Ahmeti ka përkujtuar figurën e Goce Dellçev në përvjetorin e vdekjes së tij, përmes një publikimi në rrjetet sociale, ku ka ndarë edhe një fotografi të rrallë ku ai shfaqet me plis të bardhë. Përmes një mesazhi reflektues, Ahmeti ka vlerësuar jetën dhe veprën e Dellçevit si një shembull që duhet të shërbejë si mësim për klasën e sotme politike, duke rikujtuar edhe devizën e njohur të revolucionarit për bashkëjetesën dhe garën e qytetëruar mes popujve.
Shkrimi i plotë i Ali Ahmetit në FB:
Si sot më katër maj të vitit 1903 është shuar Goce Dellçevi, revolucionar i njohur, jeta dhe vepra e të cilit do të duhej të ishte mësim edhe për klasën e sotme politike: "Unë e kuptoj botën si një garë të kulturuar mes popujve" - ishte deviza e tij. 
Ndërkaq, biografi i tij më i mirë, Pejo Javorov, duke sjellë foton e mëposhtme të Goces, me plisin e bardhë, e jep  këtë përshkrim:
"Plisi i bardhë arnaut me shall të zi, i mbështjellë përreth, e mbulonte jo aq shumë kokën. Palltoja e përhimtë prej shajaku, tyrqet e përhimta prej shajaku dhe çashiret me ngjyrë arre të përveshura deri në gjunjë në opingat e shtrënguara – i shquante format e drejta të një figure mesatare. Qepeja e përhimtë e mbyllur, e veshur vetëm në krahun e majtë, gjysmë e ngjeshur dhe e tërhequr deri në gjysmë në të djathtë, i jepte veçmas bukuri hyjnore gjithë shfaqjes së krenarisë. Me kamë, revolver dhe brezoren me fishekë në bel, me maliherin e hedhur mbi sup, Gocja i ngjante një perëndie kaçake."
I përjetshëm kujtimi për Revolucionarin Goce Dellçev!