Qendra për Komunikime Qytetare sot, në Fakultetin Juridik në Kërçovë, mbajti një punëtori me studentët në kuadër të projektit “RISE Balkans”, i fokusuar në fuqizimin e zërit të të rinjve në rajon. Në kuadër të aktiviteteve u realizua edhe një anketë, rezultatet e së cilës zbulojnë qëndrime të rëndësishme të të rinjve në vend.

Dekanija e Fakultetit Juridik në Kërçovë, prof. dr. Svetlana Veljanovska, theksoi se realizimi i projektit do të zgjasë dy vite, ndërsa qëllimi kryesor i tij është forcimi dhe avancimi i rolit të të rinjve në proceset demokratike.

Nga ana tjetër, kryetari i Qendrës për Komunikime Qytetare, German Filkov, për TV Uskana deklaroi se projekti synon që të rinjtë të njohin sfidat kryesore shoqërore si korrupsioni, transparenca dhe integriteti. Sipas rezultateve të anketës, shumica e të anketuarve mendojnë se të rinjtë mund të bëjnë ndryshim, por një pjesë e konsiderueshme ende nuk ndihen të gatshëm të raportojnë parregullsi apo të përfshihen aktivisht në përmirësimin e gjendjes dhe hartimin e politikave.

Organizatorët paralajmërojnë se aktivitete të tilla do të vazhdojnë edhe në periudhën në vijim, me qëllim nxitjen e pjesëmarrjes më të madhe të të rinjve në proceset shoqërore.