Sulmet ruse vranë më shumë se 20 persona në të gjithë Ukrainën të martën, përfshirë 12 në një nga sulmet më vdekjeprurëse të këtij viti, disa orë para fillimit në mesnatë të një armëpushimi të pacaktuar të propozuar nga Kievi.

Pasi Rusia nisi sulme të mëtejshme me raketa dhe dronë të mërkurën në mëngjes, Presidenti i Ukrainës, Volodymyr Zelensky, tha se Moska kishte zgjedhur qartë të refuzonte ofertën e Kievit për një armëpushim.

Ukraina kishte njoftuar ndalimin e luftimeve pasi Rusia shpalli në mënyrë të njëanshme armëpushimin e saj. Rusia tha se do të mbajë një armëpushim më 8 dhe 9 maj përpara përkujtimeve të së shtunës për të shënuar fitoren e Bashkimit Sovjetik ndaj Gjermanisë naziste, shkruan CNN, raporton KlanKosova.tv.

Ministria e Mbrojtjes e Rusisë tha se çdo përpjekje nga Ukraina për të prishur paradën e Ditës së Fitores do të shkaktonte një “sulm hakmarrës masiv me raketa” në qendër të Kievit.

Në përgjigje, Zelensky njoftoi në atë kohë një armëpushim të pacaktuar që do të fillonte në mesnatë të së martës, duke thënë se Ukraina kërkonte paqe të qëndrueshme, jo një pushim të shkurtër që të përkonte me “festën” e Rusisë.

Zelensky tha të mërkurën se Ukraina kishte “deklaruar qartë se do të vepronte në të njëjtën mënyrë”, duke marrë parasysh “thirrjet e vazhdueshme” të Rusisë për një armëpushim gjatë paradës së Ditës së Fitores në Moskë. Duke pasur parasysh se Moska e shkeli atë armëpushim, Zelensky tha se Kievi së shpejti do të “vendosë për veprime të mëtejshme”.