Shkolla Fillore “Gjergj Kastrioti Skënderbeu” në fshatin Sërbicë të Kërçovës shënoi ditën e shkollës, e cila përkon edhe me përvjetorin e lindjes së kryeheroit kombëtar Gjergj Kastrioti Skënderbeu. E veçanta e këtij manifestimi ishte prania e djemve të Mahmut Dumanit, arsimtarit themelues të arsimit shqip në këtë zonë, i cili kishte ardhur nga Shqipëria në kohën e ministrit të atëhershëm të arsimit Ernest Koliqi, për të dhënë kontributin e tij si mësues i parë në gjuhën shqipe, duke edukuar breza të tërë.
Programi festiv nisi me intonimin e himnit kombëtar nga nxënësit e shkollës. Më pas, të pranishmit i përshëndeti drejtoresha e shkollës, Shkëlqime Bekteshi, e cila u uroi mirëseardhje të gjithë pjesëmarrësve dhe vlerësoi rëndësinë e kësaj dite.

Fjalë përshëndetëse mbajti edhe Iliri, djali i Mahmut Dumanit, i cili theksoi lidhjen e ngushtë që kishte babai i tij me Kërçovën dhe në veçanti me fshatin Sërbicë.

Në vijim të programit, nxënësit u paraqitën me pika të ndryshme artistike, duke përcjellë mesazhe të fuqishme nën frymën arbërore dhe duke dëshmuar përkushtimin e tyre ndaj kulturës dhe traditës kombëtare.

Në përmbyllje të aktivitetit, u ndanë mirënjohje për nxënësit dhe arsimtarët për sukseset e arritura gjatë këtij viti shkollor.