SHMK Drita ka emëruar në postin e drejtoreshës së shkollës profesoreshën Syarta Spahiu, e cila vjen me përvojë shumëvjeçare në fushën e arsimit dhe të gjuhës gjermane.
Syarta Spahiu karrierën e saj profesionale e nisi si asistente në Universiteti Shtetëror i Tetovës, në drejtimin Gjuhë dhe Letërsi Gjermane, ku ka punuar në periudhën 2013-2017. Më pas ajo ka ushtruar profesionin e mësimdhënëses së gjuhës gjermane në gjimnazin “Rilindja” në Zhitoshë, ndërsa nga viti 2019 e deri më tani ka qenë profesoreshë në SHMK Drita.
Shkollimin fillor e ka ndjekur në Luzern të Zvicrës, ndërsa arsimin e mesëm në SHMK Mirko Mileski. Studimet universitare dhe ato të masterit i ka përfunduar në Universiteti Shtetëror i Tetovës, në Fakultetin Filologjik, drejtimi Gjuhë dhe Letërsi Gjermane.
Gjatë periudhës së pandemisë, përveç angazhimit në mësimin online në gjimnazin “Drita”, Spahiu ka punuar online edhe në dy shkolla private në Vienë të Austrisë dhe në Berlin të Gjermanisë.
Drejtoresha e re e SHMK “Drita” shquhet për pasionin ndaj arsimit dhe kulturave të ndryshme evropiane. Ajo thotë se pëlqen të udhëtojë dhe të vizitojë shkolla evropiane, për të parë nga afër mënyrat e ndryshme të mësimdhënies dhe për të sjellë përvoja të reja në arsim.
“Jeta është karma! Aura nuk më zhgënjen!”, është thënia e saj e preferuar.