Ka ndërruar jetë politikani i njohur kosovar, Prof. Dr.  Alush Gashi, një prej figurave më të hershme të Lidhjes Demokratike të Kosovës (LDK) dhe bashkëpunëtor i afërt i ish-presidentit Ibrahim Rugova.

Gashi ishte ndër themeluesit e strukturave institucionale të LDK-së gjatë viteve ’90 dhe për dekada me radhë mbeti aktiv në jetën politike dhe publike të vendit.

Ai ka shërbyer edhe si ministër i Shëndetësisë në Kosovë, ndërsa njihej si një nga përfaqësuesit më të spikatur të krahut rugovist brenda LDK-së.

Në një postim në Facebook, ish-presidenti i Kosovës, Fatmir Sejdiu, për ndarjen nga jeta të Prof. Dr. Alush Gashit ka shkruar:

Me pikëllim të thellë mora lajmin për ndarjen e papritur nga jeta të profesorit, mjekut dhe veprimtarit dr. Alush Gashi, një nga personalitetet e dalluara dhe me kontribute të veçanta për lirinë dhe pavarësinë e Kosovës.

Kam ndarë kohë dhe angazhime të shumta me dr. Alushin në punën tonë të përbashkët në Lidhjen Demokratike të Kosovës dhe në shtetndërtim, ku ai mori edhe angazhime shtesë në bashkëpunimin dhe krijimin e më shumë lidhjeve e miqve të Kosovës në botë, veçmas në SHBA.

Dr. Alushi kontribuoi me dijen dhe përkushtimin e tij si shef i Grupit parlamentar të LDK -së në Parlamentin e Kosovës, duke qenë nënshkrues i Deklaratës së Pavarësisë së Kosovës më 17 shkurt 2008, e më pas edhe ministër i Shëndetësisë.

Shpreh ngushëllimet e mia më të sinqerta për bashkëshorten, fëmijët, familjen Gashi dhe të gjithë ata që patën fatin ta njohin dhe të punojnë me dr. Alush Gashin.