Çiklisti Gabriele De Fabritiis triumfoi në etapën e 5-të të edicionit të 83-të të Rrethit Çiklistik të Shqipërisë, duke regjistruar një fitore të rëndësishme në një garë të karakterizuar nga rivaliteti i fortë sportiv.

Ministri i Turizmit, Kulturës dhe Sportit, Blendi Gonxhja reagoi në lidhje me këtë triumf të çiklistit Fabritiis, ndërsa u shpreh se “në kilometrat vendimtarë të etapës finale, De Fabritiis arriti të shfaqë performancë të qëndrueshme, duke kontrolluar ritmin e garës dhe duke siguruar i pari vijën e finishit, pas një gare të zhvilluar me intensitet dhe strategji”.

“Një etapë spektakolare, emocione deri në metrat e fundit dhe një kampion i denjë për podiumin e madh të Tour of Albania”, tha Gonxhja.

Etapa e 5-të e Turit Çiklistik të Shqipërisë solli emocione deri në metrat e fundit, duke konfirmuar nivelin e lartë konkurrues të garës dhe interesin e madh të sportdashësve për këtë aktivitet tradicional të çiklizmit në vend.

Turi Çiklistik i Shqipërisë 2026 ka përfunduar sot me etapën e 5-të dhe të fundit. Sipas itinerarit të përpiluar nga Federata Shqiptare e Çiklizmit, etapa e 5-të nisi në Vlorë dhe përfundoi në Fier, ku është kurorëzuar dhe fituesi i këtij edicioni të 83-të.

Me një itinerar prej 121,3 kilometrash etapa ishte mjaft emocionuese nga çiklistët e 18 ekipeve pjesëmarrëse. Pas rreth tre orësh garë, i pari në finish mbërriti 22-vjeçari Gabriele De Fabritiis, përfaqësues i ekipit kombëtar shqiptar, i cili la pas grekun Georgios Bouglas ndërsa në vendin e tretë u rendit rumuni Alin Toader.