Policia e Kërçovës gjatë kontrolleve të shtuara në trafik ka arrestuar katër persona, mes tyre edhe tre të mitur, pasi janë kapur duke drejtuar mopedë dhe motoçikletë pa patentë shoferi. Rastet janë regjistruar gjatë 22 majit në pika të ndryshme të qytetit.
Sipas informacioneve nga MPB-ja, fillimisht në orët e paradites është ndaluar një 12-vjeçar nga Kërçova, i cili drejtonte motoçikletë pa targa regjistrimi dhe pa leje për vozitje. Në të njëjtën kohë, policia ka ndaluar edhe një 14-vjeçar që drejtonte moped me targa të Kërçovës, ndërsa gjatë kontrollit është konstatuar se edhe ai nuk posedonte patentë shoferi.
Më vonë gjatë ditës, në një rast tjetër është ndaluar një 23-vjeçar nga Kërçova duke drejtuar moped me targa të Manastirit pa leje për vozitje, ndërsa në orët e pasdites policia ka kapur edhe një 16-vjeçar që drejtonte moped pa patentë shoferi.
Nga policia bëjnë të ditur se të gjitha mjetet janë konfiskuar, ndërsa pas dokumentimit të plotë të rasteve do të parashtrohen kallëzime përkatëse.