Prej sot, çdo qytetar dhe qytetare e Maqedonisë së Veriut që posedon patentë shoferi të kategorisë “B”, fiton të drejtën të drejtojë motoçikleta automatike të kategorisë “A1” deri në 125 cm³ dhe me fuqi deri në 11 KW. Këtë, përmes një njoftimi në rrjetet sociale, e bëri të ditur deputetja nga Kërçova, Valbona Adili Emini.

Ky ndryshim vjen pas miratimit të ndryshimeve në Ligjin për Siguri në Komunikacionin Rrugor, të cilat u votuan me mbështetjen e shumicës së deputetëve në Kuvendin e Republikës së Maqedonisë së Veriut.

Sipas dispozitave të reja ligjore, qytetarët duhet të plotësojnë këto kushte:

Të jenë minimum 23 vjeç
Të kenë së paku 5 vite patentë shoferi të kategorisë “B”
Të ndjekin trajnim teorik 4-orësh

Ky ndryshim ligjor synon të sjellë më shumë lehtësi dhe fleksibilitet për qytetarët, duke kontribuar në:

uljen e trafikut urban
rritjen e mobilitetit
transport më ekonomik dhe ekologjik
qarkullim më praktik në qytete

Modeli tashmë aplikohet në shumë vende të Bashkimit Evropian, ndërsa Maqedonia e Veriut bëhet një nga vendet e para në rajon që implementon këtë direktivë evropiane.

Autoritetet apelojnë që të respektohen rregullat e komunikacionit dhe të kontribuohet për më shumë siguri dhe kulturë në rrugë.