Kryetari dhe kandidati për kryeministër i Partisë Demokratike të Kosovës, Bedri Hamza, ka zhvilluar një takim me gratë aktiviste dhe mbështetëse të partisë, ku ka prezantuar prioritetet e programit qeverisës të PDK-së dhe ka bërë thirrje për ndryshim në zgjedhjet e 7 qershorit. Hamza u shpreh se qytetarët nuk duhet ta pranojnë krizën si gjendje normale dhe as propagandën si rezultat të qeverisjes, duke theksuar se vendi ka nevojë për politika konkrete që përmirësojnë jetën e përditshme të familjeve. Ai tha se programi i PDK-së është i fokusuar në zhvillimin ekonomik, krijimin e vendeve të reja të punës dhe fuqizimin e grave, përmes investimeve në çerdhe, arsim, shëndetësi dhe mbështetje për bizneset që drejtohen nga gratë. “Kur fuqizohet gruaja, fuqizohet familja dhe fuqizohet shteti”, theksoi Hamza, duke shtuar se një nga synimet kryesore është rritja e pjesëmarrjes së grave në tregun e punës dhe krijimi i mundësive të barabarta ekonomike.  Hamza tha se qytetarët kanë nevojë për politika afatgjata që garantojnë stabilitet financiar dhe siguri ekonomike, duke shtuar se ndihmat e përkohshme nuk mund të zëvendësojnë zhvillimin e qëndrueshëm dhe krijimin e kushteve për mirëqenie. Sipas tij, nënat dhe familjet kanë nevojë për mbështetje të vazhdueshme, mundësi punësimi dhe institucione që i ndihmojnë të ndërtojnë të ardhmen e tyre me siguri dhe dinjitet.