Pas ndryshimit të pushtetit lokal në Komunën e Kërçovës, ku pas zgjedhjeve të fundit lokale në krye të komunës erdhi Aleksandar Jovanovski, i cili fitoi edhe një numër të konsiderueshëm votash nga elektorati shqiptar, në institucionet që funksionojnë nën kompetencën e komunës kanë ndodhur ndryshime të shumta kadrovike.
Përjashtim bëjnë vetëm shkollat ku mësimi zhvillohet në gjuhën shqipe, ndërsa në pothuajse të gjitha institucionet e tjera komunale drejtuesit shqiptarë janë zëvendësuar me kuadro maqedonase. Kjo ka ndodhur në Ndërmarrjen Publike Komunale Kominalec, si dhe në ndërmarrjen e sapothemeluar “Kërçova Projekt”, ku së fundmi për udhëheqëse u emërua Milena Gjorgjieska Dimitrieska.
Ndërkohë, ndryshime kanë ndodhur edhe në administratën komunale. Pozita e sekretarit të Komunës së Kërçovës tashmë i është besuar Aleksandar Mickoskit, duke bërë që edhe kjo pozitë e rëndësishme të drejtohet nga një kuadër maqedonas.Ndërsa në periudhën kur komuna drejtohej nga kryetar shqiptar, në postin i sekretarit të komunës ishte kuadër maqedonas.
Këto zhvillime kanë nxitur pakënaqësi te një pjesë e qytetarëve shqiptarë, duke pasur parasysh se sipas regjistrimit të fundit të popullsisë, shqiptarët përbëjnë komunitetin më të madh në numrin e përgjithshëm të popullatës në Komunën e Kërçovës . Arsyetimi që jepet për këto emërime lidhet me profesionalizmin, kompetencën dhe meritokracinë. Megjithatë, për shumë qytetarë mbetet e paqartë se si në një komunë ku shqiptarët janë shumicë, pothuajse të gjitha pozitat kryesore drejtuese po udhëhiqen nga maqedonas, sikur shqiptarët të mos kenë kuadro me përgatitje profesionale dhe aftësi të mjaftueshme për të drejtuar institucionet publike edhe pse nën udhehqejen e shqiptarëve institucionet kanë pasur zhvillim dhe suksese në menaxhim dhe rezultate të prekshme për të gjithë qytetarët e komunës së Kërçovës.