Në përfundim të vitit shkollor 2025/26, Bashkimi Demokratik për Integrim, dega në Tetovë ka drejtuar akuza ndaj Komunës së Tetovës. Sipas BDI- së, në vend të përgjigjeve, ka patur grumbullim problemesh. “Gjatë këtij viti, arsimi u përball me kërcënime të rejshme dhe të vazhdueshme me bomba, raste të dhunës në shkolla, pasiguri për vendet e punës së mësimdhënësve, paqartësi rreth optimizimit të rrjetit shkollor, ndryshime të shpeshta në drejtimin e institucioneve arsimore dhe mungesë investimesh serioze në laboratorë, kabinete, biblioteka dhe teknologji mësimore. Megjithatë, për shumicën e këtyre problemeve nuk kemi dëgjuar as analiza, as përgjegjësi dhe as plane konkrete veprimi nga institucionet kompetente veçanërisht nga Komuna e Tetovës, Këshilli komunal dhe Njësia për arsim-pranë sektorit për veprimtari publike”, theksoi Armend Imeri nga BDI.
Më tej, nga BDI thonë se mësimdhënësit jetojnë me pasigurinë e humbjes së vendeve të punës. “Sot flitet për optimizimin e rrjetit shkollor dhe racionalizimin e sistemit arsimor. Por si mund të flitet për reforma kur shumë shkolla ende përballen me mungesë të kushteve elementare për mësimdhënie cilësore? Si mund të kërkohet cilësi më e lartë kur mësimdhënësit jetojnë me pasigurinë e humbjes së vendeve të punës? Ndërsa muaji shtator po afrohet, ende nuk ka përgjigje të qarta nga institucionet kompetente se sa vende pune mund të shuhen si rezultat i procesit të optimizimit dhe sa shkolla fillore mund të përfshihen nga ky proces. Edhe pse Ministria e Arsimit ka dërguar disa shkresa, nga Komuna e Tetovës ende nuk kemi përgjigje të saktë se si do të fillojë viti shkollor”, deklaroi Armend Imeri nga Departamenti i arsimit pranë BDI- së.
Sekretariati për Arsim pranë Degës së BDI-së thotë se do të ndjekin me kujdes këtë proces të paqartë dhe se do të jetë zëri i mësimdhënësve, duke qëndruar gjithmonë pranë mësuesve të shkollave të Komunës së Tetovës. “Siguria në shkolla mbetet një shqetësim serioz. Kërcënimet e rrejshme me bomba ndërprenë procesin mësimor dhe krijuan pasiguri te nxënësit e prindërit. Edhe sot nuk ka informacione të qarta për masat e ndërmarra për të parandaluar raste të ngjashme në të ardhmen. Dhuna në shkolla mbetet një problem serioz. Fatkeqësisht, më shumë flitet pas incidenteve sesa punohet për t’i parandaluar ato. Në shumë shkolla flitet për mungesë fondesh për mjete mësimore, ndërsa njëkohësisht ngrihen shqetësime për mungesë transparence në mënyrën e shpenzimit të mjeteve publik. Edhe pse ekziston obligim ligjor për publikimin e raporteve financiare në ueb-faqet zyrtare të
shkollave, ky obligim në shumë raste nuk zbatohet në mënyrë të rregullt nëpër shkollat tona. Veçanërisht alarmuese mbetet ndërhyrja e politikës në sistemin arsimor. Ndryshimet e shpeshta të drejtorëve, emërimet me prapavijë partiake dhe politizimi i organeve shkollore vazhdojnë të jenë plagë e hapur e arsimit. Shkolla duhet të mbetet institucion profesional në shërbim të nxënësve”, deklaroi Imeri në Tetovë.
Nga BDI kërkuan përgjigje për pyetjet si sa efektivisht është realizuar mësimi në distancë (online) për nxënësit e Shkollës së Mesme Tekstile dhe kush e ka vlerësuar cilësinë dhe rezultatet e këtij procesi? Kur dhe si u zëvendësuan orët dhe ditët e humbura mësimore? Cilat masa janë marrë për sigurinë në shkolla? Cilat janë strategjitë konkrete për parandalimin e dhunës në shkolla? Kush mban përgjegjësi për numrin e zvogëluar të paraleleve në Gjimnazin “7 Marsi”, nga 12 në 5 paralele? Si do të zbatohet procesi i optimizimit dhe cilat do të jenë pasojat për shkollat dhe mësimdhënësit? Ku qëndron përgjegjësia institucionale për këto sfida?. Këto ishin pyetjet që i adresuan nga BDI.
