Projekti synon modernizimin e muzeut dhe rritjen e aksesit të publikut në fondin e pasur arkeologjik që ruan. Pas restaurimit të ndërtesës së ndërtuar në vitin 1870, do të realizohen ndërhyrje të plota në ambientet e brendshme për të ekspozuar në kushte bashkëkohore mbi 1.200 objekte arkeologjike.

Ka përfunduar procesi i restaurimit të plotë të godinës historike të Muzeut Arkeologjik të Korçës, duke shënuar një tjetër hap të rëndësishëm në ruajtjen dhe promovimin e trashëgimisë kulturore të qytetit juglindor.

Ndërsa ndërhyrjet restauruese kanë përfunduar, institucionet përgjegjëse po punojnë tashmë për muzealizimin dhe rijetëzimin e kësaj hapësire, e cila pritet të kthehet në një pikë referimi për turizmin kulturor në juglindje të vendit.

Lajmi është bërë i ditur nga ministri i Kulturës, Blendi Gonxhja, i cili publikoi pamje nga godina e restauruar dhe theksoi rëndësinë e projektit për ruajtjen e identitetit historik të Korçës.

“Kanë përfunduar punimet restauruese në godinën e Muzeut Arkeologjik të Korçës, ish-banesa historike e Fani Pjastos, një nga objektet me vlera të veçanta të trashëgimisë kulturore të qytetit. Në bashkëpunim me Institutin Kombëtar të Trashëgimisë Kulturore, Drejtorinë Rajonale të Trashëgimisë Kulturore Korçë dhe Bashkinë Korçë, po punojmë për hapat e mëtejshëm drejt muzealizimit dhe rijetëzimit të kësaj hapësire, si pjesë e një vizioni më të gjerë për krijimin e një rrjeti të integruar kulturor e muzeor që promovon historinë, identitetin lokal dhe eksperiencat autentike të zonës”, u shpreh Gonxhja.

Projekti synon modernizimin e muzeut dhe rritjen e aksesit të publikut në fondin e pasur arkeologjik që ai ruan. Pas restaurimit të ndërtesës së ndërtuar në vitin 1870, do të realizohen ndërhyrje të plota në ambientet e brendshme për të ekspozuar në kushte bashkëkohore mbi 1.200 objekte arkeologjike.

Sipas projektit, do të krijohen standarde të reja për ruajtjen dhe ekspozimin e artefakteve, duke përmirësuar njëkohësisht përvojën e vizitorëve dhe aksesueshmërinë e muzeut.

Nisma është pjesë e strategjisë për zhvillimin e turizmit kulturor në Korçë dhe promovimin e trashëgimisë historike të rajonit. Përmes këtij investimi synohet pasurimi i ofertës turistike dhe edukative të qytetit, i cili prej vitesh mbetet një nga destinacionet më të vizituara në Shqipëri.

Muzeu Arkeologjik i Korçës u krijua në vitin 1985 në një godinë karakteristike të shekullit XIX. Fondi i tij përmban artefakte që dokumentojnë rreth 7 mijë vite histori, nga periudha neolitike deri në mesjetë, duke përfshirë zbulime arkeologjike të rëndësishme nga zona të ndryshme të juglindjes së vendit.