Shkolla e Valleve Shqipe “Uskana e Re”, që vepron në kuadër të Institucionit Nacional – Qendra e Kulturës “Koço Racin” në Kërçovë, po vazhdon të korrë suksese në festivalet ndërkombëtare të folklorit.
Pas paraqitjes së suksesshme në Festivalin Ndërkombëtar në Durrës, ku fitoi vendin e dytë për vallen më të mirë popullore, ansambli shkëlqeu edhe në festivalin e mbajtur në Kurbin. Natën e parë të turneut e ndoqi nga afër edhe drejtori i sapoemëruar i institucionit, Fluturim Ibraimi, i cili përgëzoi valltarët dhe udhëheqësit e tyre për përkushtimin dhe rezultatet e arritura.
Ibraimi vlerësoi punën e koreografëve Avni dhe Xheneta Zeneli, si dhe mbështetjen e bashkëpunëtorëve dhe prindërve, të cilët kanë rol të rëndësishëm në suksesin e fëmijëve.
Turneu kulturor i “Uskana e Re” vazhdon më 16 qershor në Prishtinë, në kuadër të Festivalit “Demastion”, ndërsa më 18 qershor Kërçova do të mirëpresë Festivalin Ndërkombëtar Folklorik, ku do të marrin pjesë grupe nga vende të ndryshme.