KËRÇOVË – Publiku kërçovar do të ketë mundësinë  më 21 qershor 2026 (e diel), me fillim në ora 19:00, në Pallatin e Kulturës “Koço Racin” në Kërçovë të ndjekë nga afër komedinë e njohur botërore “Koprraci”, një nga veprat më të famshme të dramaturgut francez Molière. Kjo vepër klasike, e cila vazhdon të mbetet aktuale edhe në ditët e sotme, do të vihet në skenë nga studentët e Fakultetit të Arteve në Tetovë.

Mundësia që kjo shfaqje të prezantohet para publikut në Kërçovë është bërë e mundur falë angazhimit të studentit kërçovar Xheladin Rufati, i cili do të interpretojë në skenë së bashku me kolegët e tij Fatmir Palloshi dhe Andi Shaqiri.

“Koprraci” trajton me humor dhe zgjuarsi temën e lakmisë dhe lidhjes së tepruar pas pasurisë materiale. Përmes personazhit kryesor, Harpagoni, publiku do të shohë se si dëshira e pakufishme për para mund të ndikojë negativisht në marrëdhëniet familjare, në dashuri dhe në jetën e përditshme. Megjithatë, vepra nuk synon vetëm të argëtojë, por edhe të përcjellë mesazhe të rëndësishme morale dhe shoqërore.

Qëllimi i kësaj shfaqjeje është të nxisë reflektimin mbi vlerat e vërteta të jetës, duke treguar se lumturia nuk matet me pasuri materiale, por me dashuri, mirëkuptim, respekt dhe marrëdhënie të shëndosha mes njerëzve. Përmes situatave komike dhe ngjarjeve plot humor, shikuesit do të kenë mundësinë të nxjerrin mësime të vlefshme, ndërsa njëkohësisht do të kalojnë momente të këndshme dhe të paharrueshme.

Organizatorët premtojnë një mbrëmje të mbushur me energji, batuta dhe interpretime cilësore, që do të sjellin të qeshura nga fillimi deri në fund të shfaqjes.