Kolonja mirëpriti për dy netë me radhë Festivalin Kombëtar të Sazeve, një nga aktivitetet më të rëndësishme kushtuar muzikës tradicionale shqiptare.

Në Leskovik dhe Ersekë u ngjitën në skenë grupe folklorike nga zona të ndryshme të vendit, të cilat sollën për publikun këngë, valle dhe interpretimet më përfaqësuese të traditës popullore.

Festivali, që organizohet prej vitesh në këtë trevë, synon ruajtjen dhe promovimin e trashëgimisë kulturore jomateriale.

“Festivali në tërësi synon promovimin e trashëgimisë jo materiale dhe më saktësisht promovimin e sazeve popullore. Duke qenë që është informacion shumë unik për Shqipërinë dhe shumë i rëndësishëm për trashëgiminë tonë shpirtërore, meriton që jo vetëm të ruhet, por edhe të trashëgohet në brezat e rinj dhe ky është pikërisht qëllimi i këtij festivali”, u shpreh Erilda Selaj, Drejtore e Qendrës Kombëtare të Veprimtarive Tradicionale

Artistët vlerësuan rëndësinë e këtij festivali në ruajtjen e muzikës tradicionale dhe përcjelljen e saj tek brezat e rinj.

“Instrumenti është një gjë e dashur për mua. Një gjë e një gjë e bukur që është muzika që mund të pyesim është edhe instrumenti. Çfarë është muzika është edhe instrumenti”,

“Është një festival i cili përveç trashëgimisë e të gjitha gjërave që kultura jonë popullore i ka me shekuj që t’i ruajë dhe të t’i trashëgojë ato brez pas brezi”, thanë disa prej tyre.

Me tingujt karakteristikë të sazeve, vallet dhe këngët popullore, festivali solli edhe një herë në vëmendje pasurinë e folklorit shqiptar, me qëllim mbajtjen gjallë të traditave dhe forcimin e lidhjes së brezave të rinj me kulturën dhe identitetin kombëtar.

Gazetare: E. Fili                

/rtsh.al/