Kryeministri Edi Rama njoftoi nisjen e një projekti të ri për bashkitë e vendit, të quajtur “Rilindja Urbane 2”, ku fokusi do të jetë te sistemi i ujësjellësit dhe transporti publik urban e ndërurban. “Në javën e parë të korrikut do të prezantojmë… fokusi te ujësjellësi dhe transporti”, tha Rama.

Lajmin ai e dha gjatë një aktiviteti kushtuar infrastrukturës nëntokësore në zonat urbane, me fokus sistemimin e kabllove ajrore dhe strukturave të improvizuara. “Sot është plotësisht e mundur që të pastrojmë qytetet tona nga fijet plastike të merimangave dhe, siç e tregon inventari, pjesa dërrmuese e këtyre kabllove janë pa funksion, por qëndrojnë aty thjesht si shenjë e harresës dhe mungesës së vëmendjes”, tha Rama.

Duke kërkuar angazhim maksimal nga kryetarët e bashkive për realizimin e këtyre projekteve, Rama nuk i kurseu kritikat për disa prej tyre, kryesisht për drejtuesit vendorë të zonave juglindore. “Kam një vërejtje për disa nga kryetarët e bashkive. Nuk dua t’i përmend këtu me emër, por janë bërë disi problematikë për komunitetin, pasi nuk qëndrojnë në bashkitë që drejtojnë gjatë gjithë javës, por vijnë në Tiranë edhe në ditët kur duhet të jenë në krye të detyrës atje. Është shumë e rëndësishme që kjo praktikë të marrë fund. Herën tjetër do të duhet t’i përmend me emër dhe publikisht… kryesisht në jug dhe juglindje të vendit, në aksin Tiranë–Korçë”, tha Rama.

Ministri i Pushtetit Vendor, Arbjan Mazniku Demo, bëri thirrje që bashkitë të punojnë për rritjen e kapaciteteve administrative, me qëllim thithjen e sa më shumë fondeve dhe plotësimin e të gjitha kërkesave. Ndërsa ministri i Infrastrukturës dhe Energjisë, Enea Karakaçi, deklaroi se synohet që, nëpërmjet këtij projekti, zonat e banuara të mbulohen nga rrjeti 5G.

Rama njoftoi gjithashtu se programi për mbështetjen e start-up-eve do të përfitojë financime të reja, pasi numri i aplikimeve cilësore ka qenë më i lartë se sa ishte parashikuar.