Qeveria e Maqedonisë së Veriut ka propozuar që trotinetët elektriktë të drejtohen vetëm nga personat mbi 18 vjeç dhe shpejtësia maksimale e trotinetëve elektrikë të kufizohet në 20 kilometra në orë, ndërsa gjobat të ashpërsohen, transmeton Portalb.mk.

Gjithashtu po ashpërsohen edhe dënimet për kundërvajtjet e bëra. Përveç gjobës që do të duhet të paguhet, trotineti elektrik, mopedo ose motoçikleta do të konfiskohet për 30 ditë nga personat që do të kapen duke vozitur nën ndikimin e alkoolit, nëse janë të mitur, ose nëse në trotinet ngjiten duke udhëtuar nga dy apo tre persona njëkohësisht.

Këto janë ndryshimet e reja në Ligjin për siguri në komunikacion, të propozuara nga shumica parlamentare, të cilat Kuvendi i ka futur në rend dite në seancën plenare të sotme.

Mbetet e paqartë se si do të kapen ata që do të ngasin me shpejtësi më të madhe, pasi kamerat e sistemit „Qyteti i Sigurt“ nuk i regjistrojnë dhe nuk i ndëshkojnë as motorët që lëvizin dukshëm mbi shpejtësinë e lejuar. Deputetët votuan që ky ligj të miratohet me procedurë të shpejtë, respektivisht pa kaluar nëpër komisionet parlamentare.

Propozues të ndryshimeve ligjore janë koordinatori i grupit parlamentar të VMRO-DPMNE-së, Nikolla Micevski, dhe një grup deputetësh nga partia e tij.

Duke arsyetuar propozimin, ai tha se në dy vjet e gjysmë të kaluara kanë ndodhur 2.352 aksidente trafiku ku kanë qenë të përfshirë mopede, motoçikleta dhe trotinete elektrikë, në të cilat kanë humbur jetën 46 persona, ndërsa 585 kanë marrë lëndime të rënda trupore.

„Në ndryshimet ligjore do të definohet se çfarë është një automjet i lehtë elektrik, do të rregullohet shpejtësia e lejuar në maksimum deri në 20 kilometra në orë në përputhje me rregulloret evropiane, ndërsa trotinetet elektrikë do të mund t’i ngasin vetëm personat madhorë. Kjo bëhet me qëllim të mbrojtjes së të rinjve, pasi në gjysmën e aksidenteve ku kanë qenë të përfshirë trotinetet, bëhet fjalë për fëmijë të moshës 16-17 vjeçare“, tha propozuesi Micevski.