Problemi me qentë endacakë vazhdon të mbetet një nga shqetësimet më të mëdha për qytetarët e Kërçovës. Ndonëse për gati një vit nuk ka pasur njoftime publike  nga SPB-Ohër lidhur me sulmet dhe kafshimet nga qentë endacakë, të dhënat zyrtare të siguruara nga Tv Uskana tregojnë se ky fenomen vazhdon të jetë i pranishëm.
Për të sqaruar situatën, TV Uskana iu drejtua me pyetje SPB-Ohër. Në përgjigjen e tyre thuhet se në periudhën nga 1 nëntori 2025 deri më 30 maj 2026, në stacionin policor në Kërçovë janë regjistruar gjithsej 97 raste të personave të kafshuar nga qentë, të cilat janë evidentuar në buletinin ditor policor.
Lidhur me këtë çështje, TV Uskana pyetje dërgoi edhe deri te Komuna e Kërçovës, duke kërkuar informacione për masat që po ndërmerren për zgjidhjen e problemit me qentë endacakë. Megjithatë, deri në momentin e përgatitjes së këtij lajmi, nga komuna nuk kemi pranuar asnjë përgjigje.
Kujtojmë se para rreth një viti raportimet për qytetarë të kafshuar nga qentë endacakë ishin pothuajse të përditshme dhe publikoheshin rregullisht. Megjithatë, pas ndryshimit të pushtetit lokal në Kërçovë, këto raportime pothuajse janë ndalur. Mbetet e paqartë nëse bëhet fjalë për një ndryshim në praktikën e informimit të opinionit publik apo për një qasje tjetër institucionale ndaj këtij problemi.
Pavarësisht mungesës së njoftimeve publike, shifrat zyrtare tregojnë se problemi me qentë endacakë vazhdon të jetë serioz dhe se qytetarët e Kërçovës ende përballen me rrezikun e sulmeve dhe kafshimeve nga qentë endacakë.