Kompania amerikane e Inteligjencës Artificiale Anthropic ka akuzuar gjigantin kinez Alibaba dhe njësinë e tij të AI-së, Qwen, për atë që e cilëson si përpjekjen më të madhe të njohur deri më sot për të kopjuar në mënyrë të paligjshme aftësitë e modelit të saj Claude.

Sipas raportimeve të Reuters, Anthropic pretendon se operatorë të lidhur me Alibaba dhe laboratorin Qwen zhvilluan një fushatë të gjerë të ashtuquajtur “distillation” (distilim i modeleve AI) gjatë periudhës 22 prill – 5 qershor 2026. Kjo praktikë konsiston në përdorimin masiv të një modeli të avancuar për të trajnuar ose riprodhuar aftësitë e një modeli tjetër.

Kompania amerikane thotë se gjatë kësaj periudhe janë krijuar afro 25 mijë llogari të rreme, të cilat kanë gjeneruar mbi 28.8 milionë ndërveprime me platformën Claude, me qëllim nxjerrjen e informacionit dhe sjelljeve të modelit.

Anthropic e konsideron këtë operacion si përpjekjen më të madhe të dokumentuar deri më sot për të përvetësuar kapacitetet e një sistemi të inteligjencës artificiale përmes teknikave të distilimit, duke ngritur shqetësime serioze për mbrojtjen e pronësisë intelektuale në epokën e AI-së.

Akuzat vijnë në një kohë kur konkurrenca globale për zhvillimin e modeleve gjeneruese të inteligjencës artificiale është intensifikuar ndjeshëm, ndërsa marrëdhëniet teknologjike midis Shteteve të Bashkuara dhe Kinës vijojnë të mbeten të tensionuara.

Deri më tani, Alibaba nuk ka komentuar publikisht mbi pretendimet e Anthropic. Ndërkohë, debati mbi kufijtë ligjorë dhe etikë të trajnimit të modeleve AI me të dhëna ose rezultate të prodhuara nga sisteme konkurruese po bëhet gjithnjë e më i rëndësishëm për industrinë globale të teknologjisë.