Qyteti i Kërçovës së shpejti do të bëhet pjesë e projektit shtetëror “Safe City” (Qytet i Sigurt), i cili ka për qëllim rritjen e sigurisë në komunikacion dhe përmirësimin e rendit publik përmes teknologjisë moderne të mbikëqyrjes.
Në një përgjigje për TV Uskana, nga SPB Ohër bëjnë të ditur se projekti “Qytet i Sigurt”, i cili zyrtarisht ka nisur zbatimin më 1 shkurt 2026, gradualisht do të shtrihet në të gjithë territorin e vendit, përfshirë edhe zonën e Sektorit për Punë të Brendshme në Kërçovë.
Sipas njoftimit, tash më ka filluar vendosja e kamerave në disa nga bulevardet dhe rrugët më të frekuentuara të qytetit, si dhe në rrugën magjistrale që kalon përmes rajonit të Kërçovës. Para funksionalizimit të sistemit do të realizohen përgatitjet e nevojshme teknike.
Nga SPB Ohër theksojnë se frekuenca dhe dendësia e trafikut në rajonin e Kërçovës po shënon rritje graduale, ndërsa për ruajtjen e sigurisë në komunikacion po ndërmerren masa preventive dhe represive ndaj shkelësve të rregullave të trafikut.
Kontrollet e rregullta përfshijnë drejtuesit e automjeteve dhe mjetet motorike, me fokus në zbulimin e shkeljeve si drejtimi pa patentë shoferi, drejtimi nën ndikimin e alkoolit, dokumentacioni i skaduar dhe kundërvajtje të tjera që shpesh janë shkaktarë të aksidenteve.
Njëkohësisht, është rritur intensiteti i kontrolleve të trafikut në të gjithë rajonin, ndërsa tashmë po përdoren edhe kamera elektronike mobile, të cilat vendosen në lokacione të ndryshme brenda dhe jashtë qytetit. Autoritetet paralajmërojnë se do të intensifikohen edhe fushatat parandaluese me qëllim ngritjen e vetëdijes dhe kulturës së sigurisë tek të gjithë pjesëmarrësit në komunikacion.
Policia apelon që shoferët dhe pjesëmarrësit e tjerë në trafik të respektojnë plotësisht rregullat dhe sinjalizimin rrugor, duke theksuar se kjo do të kontribuojë në uljen e numrit të aksidenteve dhe rritjen e sigurisë në rrugët e Kërçovës.