Në seancën e fundit të Këshillit Komunal të Kërçovës, këshilltarët miratuan njëzëri kërkesën e Shkollës Fillore “Naim Frashëri” nga fshati Jagoll për hapjen e një qendrimi ditor për nxënësit.
Propozimi u paraqit në emër të drejtorit të shkollës nga Valdet Selimi, përfaqësues i administratës së Këshillit Komunal, ndërsa kërkesa mori mbështetjen e plotë të këshilltarëve.

Ndërsa këshilltari i BDI-së, Asip Zendeli, apeloi që edhe shkollat e tjera fillore në vendbanimet rurale të paraqesin kërkesa të ngjashme për hapjen e qendrimeve ditore. Sipas tij, kjo masë do të ndikonte në përmirësimin e kushteve për nxënësit dhe familjet e tyre, duke u ofruar prindërve më shumë lehtësi në organizimin e përditshmërisë.
Zendeli theksoi se hapja e qendrimeve ditore mund të jetë një nga mënyrat për të parandaluar rënien e numrit të nxënësve në shkollat rurale, një problem me të cilin po përballen shumë vendbanime në Komunën e Kërçovës.