Të paktën 39 persona kanë humbur jetën si pasojë e përmbytjeve të shkaktuara nga stuhia tropikale Maysak në Kinën jugore, ndërsa shumica e viktimave u regjistruan pas shpërthimit të një dige që përmbyti qytetin e Nanningut.

Nënkryetari i bashkisë së Nanningut, Ding Wei, bëri të ditur në një konferencë për shtyp se 26 nga viktimat humbën jetën si pasojë e shpërthimit të digës. Numri i të vdekurve është rritur ndjeshëm krahasuar me bilancin fillestar prej gjashtë viktimash, ndërsa reshjet rekord të shiut shkaktuan tejmbushjen e rezervuarëve dhe përmbytje të mëdha në qytete e qyteza të rajonit Guangxi.

Autoritetet kanë evakuuar rreth 130 mijë banorë nga zonat e prekura. Në operacionet e kërkim-shpëtimit janë angazhuar mbi 8 mijë efektivë, rreth 5,700 anije dhe dronë, ndërsa ekipet po përballen me rryma të forta dhe mbeturina për të arritur tek personat e bllokuar.

Sipas Qendrës Kombëtare Meteorologjike të Kinës, reshjet intensive kanë përfshirë Guangxin për disa ditë, me sasi shiu që kanë arritur nga 10 deri në 40 centimetra në disa zona dhe mbi 90 centimetra në rajonet më të goditura.

Edhe pse niveli i ujërave ka nisur të bjerë, autoritetet paralajmërojnë se reshje të tjera të dendura priten në disa zona gjatë dy ditëve të ardhshme.

Të paktën 100 kafshë, përfshirë alpaka, derra miniaturë dhe zebra, ikën nga kopshti zoologjik Guigang i provincës Guangxi pasi përmbytjet dëmtuan mjediset e tyre.
Kopshti zoologjik i bëri thirrje publikut të mërkurën për ndihmë në gjetjen e kafshëve të arratisura.

Krijesat e zhdukura përfshijnë “dy rakunë të Amerikës së Veriut, katër iriq dhe tridhjetë pallua”, sipas një deklarate të postuar nga Byroja e Kulturës, Sportit dhe Turizmit e një distrikti lokal.

Kopshti zoologjik tha se disa nga të arratisurit “mund të jenë të frikësuar dhe potencialisht agresivë”.