Komuna e Kërçovës ishte sot nikoqire e aktivitetit konsultativ me temën "Avancimi dhe forcimi i bashkëpunimit ndërkomunal në vetëqeverisjen lokale – prezantimi i projekt-ndryshimeve dhe plotësimeve të Ligjit për Bashkëpunimin Ndërkomunal", i organizuar nga Ministria e Vetëqeverisjes Lokale, me mbështetjen e Agjencisë Zvicerane për Zhvillim dhe Bashkëpunim (SDC) dhe Programit të Kombeve të Bashkuara për Zhvillim (UNDP).
Të pranishmit i përshëndeti kryetari i Komunës së Kërçovës, Aleksandar Jovanovski, i cili theksoi se bashkëpunimi ndërkomunal është një nga parakushtet kryesore për ndërtimin e komunave më të forta, më efikase dhe më të zhvilluara.

Aktivitetin e hapi zyrtarisht zëvendësministri i Vetëqeverisjes Lokale, Ercan Selimi, i cili foli për rëndësinë e përmirësimit të kornizës ligjore dhe thellimit të bashkëpunimit ndërmjet komunave si pjesë e procesit të decentralizimit.

Gjatë ngjarjes, sekretarja shtetërore në Ministrinë e Vetëqeverisjes Lokale, Julijana Pavlovska Bojeska, dhe udhëheqësja e Sektorit për Vetëqeverisje Lokale, Suzana Najkova, prezantuan aktivitetet e Ministrisë për avancimin e bashkëpunimit ndërkomunal dhe zbatimin e rekomandimeve në kuadër të reformave të administratës publike.
Projekt-ndryshimet dhe plotësimet e Ligjit për Bashkëpunimin Ndërkomunal u prezantuan nga ekspertët e UNDP-së, prof. dr. Aleksandar Spasenovski dhe prof. dr. Memed Memeti, të cilët shpalosën zgjidhjet e propozuara ligjore dhe rëndësinë e tyre për funksionimin më efikas të komunave.
Në përfundim të aktivitetit u zhvillua një diskutim, ku përfaqësues të komunave, institucioneve dhe pjesëmarrës të tjerë paraqitën propozimet, mendimet dhe sugjerimet e tyre lidhur me projekt-ndryshimet e ligjit.