Në shënimin e sotëm të Ditës Ndërkombëtare të Përkujtimit të Gjenocidit të Srebrenicës, të mbajtur në Dhomën Legjislative, Kryetari i Kuvendit, Afrim Gashi, deklaroi se Srebrenica mbetet një njollë e përhershme dhe e rëndë në ndërgjegjen e mbarë njerëzimit.

Gashi u shpreh se atë mëngjes u shuan mijëra jetë, ndërsa jeta e mijëra të tjerëve ndryshoi përgjithmonë. Sipas tij, Srebrenica ka mbetur në kujtesë si një prej krimeve më të rënda kundër njerëzimit dhe si dështimi më i madh i njerëzimit.

Ai nënvizoi se përkujtimi i tragjedive të tilla nuk duhet të reduktohet vetëm në një ceremoni, por të shërbejë si thirrje për reflektim, drejtësi dhe përgjegjësi morale.

“Obligimi ynë institucional dhe moral është të kujtojmë dhe t’u bëjmë homazh viktimave të Srebrenicës sepse kujtimi i tyre është një thirrje për të gjithë ne”, shtoi Gashi./Telegrafi/